Стресот на работа, лошиот сон и високиот крвен притисок можат да бидат рецепт за рана смрт – предупредуваат германските научници. Ова го заклучиле врз основа на студијата во која учество земале неколку работници со висок крвен притисок кои биле следени скоро 18 години. Заклучокот на крајот од студијата бил дека оние кои изјавиле оти имаат стресна работа и лош сон имале три пати поголема веројатност дека ќе умрат од срцеви болести од оние кои добро спиеле и кои немале проблеми на работа.
„Дури 50 отсто од возрасните личности имаат висок крвен притисок. Тоа е главен фактор на ризик за срцев удар, мозочен удар, болести на срцето, болести на бубрезите и прерана кардиоваскуларна смрт. Бројни студии откриле поврзаност меѓу зголемениот стрес на работа и подоцнежниот ризик од кардиоваскуларни заболувања. Пореметувањата на сонот, исто така, се поврзани со зголемен ризик“, вели доктор Грег Фонаров, професор по кардиологија.
Во новата студија истражувачите заклучиле дека меѓу личностите со хипертензија оние кои имале стрес на работа имале двојно поголем ризик од умирање од кардиоваскуларни болести, како и оние кои изјавиле дека имаат само лош сон.
Според водачот на истражувањето, доктор Карл–Хајнц Ладвиг спиењето би требало да биде време за одморање и враќање на енергијата. Доколку имате стрес на работа, сонот ви помага да се опоравите.
„За жал, лошиот сон и стресот на работа често одат рака под рака, а во комбинација со хипертензијата ефектите се уште попогубни“, додал Ладвиг.
