Во истражувањето објавено во магазинот „Nature Neuroscience“ е откриено дека стресот на мајката во текот на бременоста и изложувањето на вагиналната микробиота при породувањето може да придонесат за зголемување на ризикот од психолошки нарушувања кај децата подоцна во животот.
За ова истражување, научниците ја трансплантирале вагиналната микробиота од мајките-глувци на нивните потомци. Трансплантацијата била направена од мајки кои биле под стрес или без стрес врз машките потомци родени со царски рез, исто така, под стрес или без стрес.
Резултатите откриле дека потомците кои биле изложени на стрес во утробата, а подоцна и на микробиотата, која меѓу другото ја вклучувала и бактеријата E. coli, S. acidominimus и Peptococcaceae на мајките под стрес, изгубиле во тежина, додека кога пораснале имале зголемено ниво на хормонот на стрес.
Со добиените податоци научниците заклучиле дека потомците се под индиректно влијание на мајчината вагинална микробиота со која доаѓаат во контакт при раѓањето. Сметаат дека кај луѓето стресот на мајката за време на бременоста може да значи поголем ризик од психолошки пореметувања на детето подоцна во животот. Засега не е познато дали вагиналната микробиота влијае на тој ризик.
