Подваријантата на омикрон ВА.2 која многу брзо се прошири во Данска е многу попренослива од почестата ВА.1 подваријанта и уште поверојатно е дека со неа ќе се заразат и вакцинираните, покажала нова данска студија.
Помеѓу декември и јануари спроведена е студија, чија цел била да се анализира ширењето на инфекции со коронавирус во над 8.500 дански домаќинства.
Таа покажала дека веројатноста дека лицата заразени со подваријантата ВА.2 ќе ги заразат останатите околу себе е 33 проценти поголема во споредба со лицата заразени со варијантата ВА.1.
Студијата покажала и дека “изворната“ подваријанта ВА.1 предизвикува повеќе од 98 проценти од случаевите на инфекции со омикрон, но нејзиниот “близок роднина“ многу брзо станал доминантен вид во Данска, симнувајќи ја ВА.1 од тронот во втората недела на јануари.
“Заклучуваме дека омикрон ВА.2 е суштински значајно попренослив од ВА.1 и дека истовремено поседува својства кои го заобиколуваат имуниот систем и на тој начин дополнително го намалуваат заштитниот ефект на вакцинирањето против КОВИД-19“, заклучуваат научниците што ја спровеле студијата.
“Ако во сопственото домаќинство сте биле изложени на подваријаната омикрон ВА.2, веројатноста дека со неа ќе се заразите во рок од една недела изнесува 39 проценти. Ако наместо на подваријантата ВА.2 сте биле изложени на варијантата ВА:1, веројатноста да се заразите во рок од една недела би изнесувала 29 проценти“, појаснува водачот и главен автор на студијата Фредерик Плеснер, додавајќи дека сознанијата укажуваат на тоа дека ВА.2 е околу 33% позаразна од ВА.1.
Студијата исто така покажала дека BA.2 е релативно поуспешена од BA.1 кога станува збор за инфекција на лица вакцинирани со две дози вакцина и оние кои примиле дополнителна бустер доза.
Тоа е доказ дека оваа подваријанта поседува својства кои уште поуспешно од претходните го заобиколуваат имуниот систем.
Студијата покажала дека и во овој случај ревакцинираните лица, а особено кај оние кои примиле бустер доза биле помалку подложни на инфекција и пренос на вирусот во споредба со невакцинираните.
Прелиминарната анализа покажала дека нема разлика кога е во прашање ризикот од хоспитализација кај лицата инфицирани со подваријантата BA.2 во однос на оние заразени со BA.1.
