Професор Тим Спектор, научникот кој стои зад британската апликација за следење на симптомите на новиот коронавирус, предупредува дека вирусот кај некои заболени од КОВИД-19 зафаќа повеќе делови од телото и се однесува како автоимуно заболување.
Пациентите кои страдаат од т.н. “долготраен“ КОВИД-19 со месеци откако заболеле информираат за проблеми од типот на краток здив, хроничен замор и “магла во мозокот“.
Истражувачите од Кралскиот колеџ во Лондон, предводени од професорот по генетска епидемиологија Тим Спектор во соработка со здравствена компанија ги следеле податоците на повеќе од четири милиони луѓе и откриле дека ефектите од вирусот продолжено траеле кај значаен број луѓе. Со истражувањето е откриено дека симптомите на “долготрајниот КОВИД-19“ еден месец се присутни кај еден од 10 заболени, а барем три месеци подоцна и натаму страда еден од 50 пациенти.
Утврдено е дека од “долготрајниот КОВИД-19“ најчесто страдаат пациенти кои се на работна возраст, просечната старост меѓу заболените од 45 години, а во ретки случаи појавата е забележана и кај повозрасни лица над 65 години и помлади од 18 години. Жените се поподложни на поголемо влијание од “долготрајниот КОВИД-19“ во споредба со мажите.
Проф. Спектор наведува дека во првите неколку месеци од пандемијата, малку внимание се посветувало за инфицираните пациенти кои не биле толку болни за да асе хоспитализираат, а што било во 99 проценти од случаевите на зараза. Тој вели дека се покажало дека КОВИД-19 не е само потежок грип, туку кај голем број заболени се однесува како автоимуна болест која напаѓа повеќе системи во телото.
“Истражувачите открија дека голем број луѓе не се чувствувале подобро ниту по две недели од појавата на симптоми, како што се очекувало. Продолжија да ги следат и така открија дека проблеми и месеци подоцна, чувствувале голем процент на луѓе“, истакнува проф. Спектор.
“Ова е другата страна на КОВИД-19“, заклучува професорот и додава дека долготрајната болест може да се покаже како поголем јавноздравствен проблем од преголемиот број на смртни случаи од КОВИД-19.
