Пишува Д-р Илир Османи, офталмохирург
На промените во видот секогаш треба да им се обрне внимание, а појавата на симптоми кои навидум се чинат безопасни, може да се предзнак за сериозна состојба на очите.
Црните точки кои „пливаат“ пред очите се едни од најчестите симптоми поради кои пациентите се обраќаат на офталмолог. Црните точки или „мушички“ всушност не „пливаат“ пред окото туку лебдат во средниот дел на окото, а ние субјективно ги гледаме напред. Овие мушички се наоѓаат во стаклестото телото чиј среден дел е исполнет со гел.
Со текот на годинините, конзистентоста на овој гел се менува – тоа е комплетно природен физиолошки процес и накупнината на колагенот формира густина која изгледа како „мушички“ или eye floaters. Оваа појава е безопасна и не претставува закана за видот.
Меѓутоа, доколку овие „мушички“ ги има многу и дополнително со нив се појавуваат црвенило, иритација или влошување на видот, тоа може да биде сериозен процес, воспаление или крварење на окото и потребно е веднаш да се обратат кај офталмолог.
Исто така, блесоци пред очите се чест симптом кој пациентите ги води на очен преглед. Веќе објаснивме како со годините, стаклестото тело односно гелот кој го исполнува средниот дел на окото, структурно се менува. Поради физиолошкиот процес, може да се одвои и задниот дел на окото поради што се појавуваат блесоци при движење на окото или главата. Ова е безопасен симптом.
Но, блесоци пред очите може да се појават и како резултат на пукната ретина, и тоа е итна состојба која подразбира офталмолошки третман. Ретината е многу тенка видна мембрана која се наоѓа во внатрешниот дел на окото, се состои од 120 милиони сензорни станици и прима видни импулси.
Кај лица кои имаат диоптрија на блиску, се препорачува преглед на широка зеница барем еднаш годишно. Во случај да „пукне“ ретината потребно е со ласер истата да се „завари“ да не доведе до аблација на ретина.
Главен симптом на аблација на ретина е појава на темна завеса или нагло губење на вид, како што пациентите најчесто опишуваат. Аблацијата претставува одлепнување на ретината, најчесто поради пукнатина низ која протекува очната течност. Аблација на ретина мора итно да се оперира затоа што сензорните клетки од кои се состои се оштетуваат во рамки на 48 часа откако ќе настане состојбата. Што побрзо се направи, толку закрепнувањето ќе биде подобро.
Кои од наведените симптоми се за поголемо внимание, а кои не, кои од нив треба да се третираат или лекуваат, а кои не, најдобро ќе ви објасни офталмологот на детален преглед на очното дно, а индивидуалниот пристап е клучен за добра дијагноза.
