Пишува д-р Павле Ѓорѓиевски, стоматолог
Плазмолифтингот е метода која ја ревитализира, обновува и затегнува кожата на природен начин. Покрај тоа, плазмолифтингот има широка примена и во медицината и во стоматологијата. Во стоматологијата се користи најчесто за третман на воспаленија на непцата, гингивитис, за терапија на парадентопатии, периимплантити и други случаи. Оваа метода се применува и кај спортски повреди, особено кај дисторзии на зглобови, а делува и кај рани и исеченици, урогенитални и бубрежни проблеми. Во медицинско-естетските постапки, пак, плазмолифтингот се користи за подмладување на првите знаци на староста, кои најчесто се појавуваат на лицето, вратот и рацете.
Плазмолифтингот има повеќе предности во однос на ботоксот и хиалуронот, првенствено бидејќи е природна метода, а и затоа што е многу применлив во медицински цели.
Како се спроведува плазмолифтингот
Процедурата за плазмолифтинг е целосно безболна за пациентот и трае најмногу еден час, во зависност од тоа што се третира. Пред почетокот на постапката во специјална епрувета се зема крв од пациентот. Крвта се центрифугира пет минути, а плазмата, по процесот на центрифугирање содржи тромбоцити, млади плурипотентни клетки и пет фактори на раст кои стимулираат регенерација на сѐ што е оштетено.
При процедурата се користи површинска анестезија, а за инјектирање на плазмата се користат минијатурни игли. Лицето се премачкува со специјална крема со анестетичко дејство и се прават убоди на секои половина сантиметар. Плазмата се вбризгува и создава мали набори под кожата, кои се од еден до два милиметри големина. Се ресорбираат до крајот на денот, а пациентот речиси веднаш го забележува освежениот изглед. Со третманот на плазмолифтинг, всушност, се стимулираат природните механизми на подмладување и регенерација на кожата, што доведува до создавање на нов колаген, еластин и меѓуклеточна материја.
Доколку се користи во стоматолошки цели, плазмата се вбризгува во непцата помеѓу забите, а резултат е регенерирање на непцата и лекување на воспаленијата. Резултатите се чувствуваат речиси веднаш, пациентите забележуваат дека се намалуваат крварењата и дека состојбата им се подобрува. Еден од најсилните ефекти е кај парадентопатијата, состојба во која луѓето ги губат забите, а во последно време е многу честа и кај помладите пациенти. Со користењето на плазмолифтингот кај оваа состојба многу брзо се чувствува намалување на гингивитисот, а со време и стимулација на раст на коската.
Плазмолифтингот е процедура која се користи и на главата, поточно во косата, а целта е стимулирање на циркулацијата и зацврстување на постоечката коса и стимулација за раст на нови влакна. Во користењето на оваа постапка, особено кај мажите, потребни се и предходни испитувања, бидејќи доколку опаѓањето на косата е хормонално, плазмолифтингот да се комбинира и со друга терапија.
Во естетско-медицинските цели, плазмолифтингот најмногу се користи за лифтинг на лице и врат, за затегнување и пополнување на брчки, подмладување на лицето, терапија на акни. Во овој случај, практично се храни кожата на местата каде што вдлабната или исушена. Во процесот се поттикнува циркулацијата, се затегнува и подмладува кожата и дава посвеж изглед на лицето и вратот.
