Пишува: доц. д-р Александар Митевски, доктор по општа медицина, специјалист по општа хирургија и субспецијалист по абдоминална хирургија
Како се лекува Пилонидалната болест
Пилонидалната болест се лекува селективно, односно планирано со претходна процена на екстензивноста на болеста. Цел на лекувањето е да се постигне зараснување на раната со мал ризик за повторување на болеста, по кратка хоспитализација, максимален комфор на пациентите и низок степен на компликации. Постојат голем број методи за лекување кои може да ги поделиме на отворени методи – методи со отворено зараснување на раната и методи со затворање на оперативната рана. Анестезијата кај сите методи за пилонидална болест може да биде локална, регионална (спинална или епидурална) и општа, што зависи и од екстензивноста на процесот и од методата што ќе ја избереме.
Без разлика кој метод ќе го избереме, почетниот дел од интервенцијата се состои во ексцидирање – исекување, отстранување на зафатениот дел на кожата и под кожата. Разликата е во тоа што кај отворената метода ја оставаме раната отворена со соодветна преврска, болничкиот престој е од 1 до 3 дена, а понатаму во текот на 6-8 недели се прават преврски и контроли сè до пополнување на раната со ткиво. Кај затворените методи правиме затворање на раната, а за тоа постојат низа техники за затворање – од едноставно сошивање до креирање на сложени резени, болничкиот престој исто така е од 1 до 3 дена, а заздравувањето е во текот на 2-4 недели. Кај отворените методи постои подолг период на закрепнување, поврзан со чести контроли и преврски. Кај затворените методи закрепнувањето е побрзо и не е поврзано со чести посетина хирург. Постои и разлика во однос на повторувањето на болеста, кое е почесто кај затворените методи во однос на отворените.
Ендоскопски третман
Покрај овие два основни типа лекување постојат и методи кои се помалку инвазивни. Принципот на овие методи е да се отстрани ткивото кое е инволвирано без да се прави дополнително оштетување на околното ткиво, што би овозможило побрзо заздравување, помала постоперативна болка и пократок период на враќање кон секојдневните активности, што се принципи на минимално инвазивните техники. Една од таквите методи е и ендоскопскиот третман на пилонидалната болест или ЕПСиТ (EPSiT – еndoscopic pilonidal sinius treatment).
Методата се состои во видеоасистирана минимално инвазивна метода со која директно визуелно се иследува и чисти целиот канал на синусот и на цистата, доколку постои, а потоа се остава со соодветна дренажа да зарасне. Болничкото лекување е од неколку часа постоперативно до еден ден, заздравувањето е до две недели, а враќање на секојдневните активности по 3-5 дена. Во однос на повторувањето на болеста, процентот е на ниво на затворените методи или нешто повисок. Сепак, не треба да се заборави дека естетскиот дел е многу подобар. Предност на минимално инвазивните методи е и тоа што не се прави голема деструкција на околните ткива, може да се повтори ако има потреба или да се направи друга процедура доколку е потребно.
Подготви: Сања Наумовска/sanja@panacea.mk
