Американските научници утврдиле дека најмалку 50 проценти од заразите со новиот коронавирус ги пренесуваат поединци без симптоми на болеста, објави стручното списание Journal of the American Medical Association.
Заменик директорот на одделот за инфективни болести во Центарот за контрола и превенција на болести на САД (CDC) и водач на истражувањето Џеј Батлер вели дека резултатите на нивната студија одат во прилог на важноста на носењето маски и придржувањето до физичко растојание.
Научниците за потребите на студијата ги класифицирале потенцијалните преносители на коронавирусот во три групи: симптоматски, пресимптоматски (оние кои се уште немаат симптоми, но ќе ги развијат) и асимптоматски.
Потоа изработиле модел за тоа колку која група ќе го шири КОВИД-19 на основа на денот кога луѓето се најзаразни. Како базна вредност го одредиле петтиот ден од изложеноста на коронавирусот, бидејќи е утврдено дека тоа е просек на траењето на инкубацијата. Тоа е време во кое повеќето луѓе развиваат симптоми.
Во моделот првично биле вградени претпоставки според кои 30 проценти од заразените се асимптоматски и според кои нивната количина на заразност е нешто помала (75%) во споредба со оное кои покажуваат или ќе развијат симптоми.
На тие претпоставки, резултатите покажале дека само асимптоматските лица се одговорни за 24 проценти од инфекциите.
Но, научниците притоа направиле сценариа според кои пикот на заразноста е третиот, четвртиот, шестиот и седмиот ден во кои го дигале и спуштале процентот на асимптоматски лица, како и нивниот степен на заразност во однос на останатите групи.
Во голем број од тие сценарија се покажало дека лицата без симптоми (асимптоматски и пресимптоматски) пренесуваат најмалку 50 проценти од новите зарази.
“Размерите на трансмисијата општо беа над 50 проценти, независно од широкиот спектар на базните вредности“, вели Батлер и додава дека аналитичарите биле изненадени од доследноста на резултатите.
Дури и во најконзервативната проценка, во која пикот на заразата е седмиот ден по изложеноста на вирусот, а асимптоматските пациенти предизвикуваат 0 проценти од инфекцијата, оние пресимптоматските сеедно предизвикале една четвртина нови случаи на КОВИД-19.
Батлер и неговите соработници истовремено предупредуваат на тоа дека нивните модели веројатно го потценуваат вистинскиот процент на ширење во кој учествуваат лицата без симптоми, бидејќи стапките ги пресметувале како сите слободно да се движат каде што сакаат.
