Терапиите што се користат во лекување на инфекцијата со КОВИД-19 во голема мера ги зголемија шансите за преживување на пациените од почетокот на пандемијата, но истражувачите сметаат дека клучната форма на терапија во превенција и лекување на болеста – моноклонални антитела, нема да делува против инфекцијата со новата подваријанта, омикрон BQ.1.1.
Омикрон BQ.1.1, кој заедно со подваријантата BQ.1 сега го чини поголемиот процент од инфекциите и брзо се шири во сите земји, е отпорен на моментално одобрените терапии со антитела, велат научниците од Истражувачкиот институт во Германија.
Анализата во ноември е објавена во научното списание The Lancet Infectious Diseases, а нејзините автори ги повикуваат лекарите повеќе да не се потпираат исклучиво на лекувањето со антитела во подрачјата каде што подваријантата BQ.1.1 е широко распространета.
Кога лекуваат високоризични пациенти заразени со коронавирус, лекарите треба да разгледаат воведување други лекови како што е паксловид, вели авторот на студијата Маркус Хофман.
Истражувачите веруваат и дека во новите околности, ќе треба да се развијат нови терапии со антитела за да може да се одржи здравствениот арсенал наменет за борба против тешки случаи на КОВИД-19.
Во лабораториските тестови на клеточни култури, истражувачите откриле дека подваријантата BQ.1.1 не успева да се неутрализира со поединечни антитела, ниту со коктели со антитела.
Тие потсетуваат дека BQ.1.1 е најновата подваријанта на SARS-CoV-2, која покажува отпорност на постоечките методи за лекување на инфекција со коронавирус. Појаснуваат и дека причината за резистенција е мутацијата на таканаречениот шилест протеин на коронавирусот.
“Со оглед на тоа што отпорноста кон варијантите на SARS-CoV-2 расте, неопходно е да се прибегне кон развој на нови начини на лекување со антитела кои се посебно прилагодени на циркулирачките и идните варијанти на вирусот“,вели Стефан Пелман, шеф на Одделот за биологија на заразни болести при Истражувачкиот центар.
