Паркинсоновата болест е втора најчеста невродегенеративна болест која се појавува кај 0,4 отсто од целокупната популација, просечно на возраст од околу 60 години.
Голема студија спроведена во Велика Британија го анализирала ова пореметување кај различна популација, се наведува во уводот на истражувањето обајвено во JAMA Neurology.
Научниците ги анализирале здравствените картони на над еден милион лица кои живееле во источен Лондон помеѓу 1990 и 2018 година, за да ги откријат ризик факторите и симптомите пред дијагнозата.
РИЗИК ФАКТОРИ
Истражувачите откриле дека познатите симптоми поврзани со Паркинсонобвата болест, вклучувајќи тремор и проблеми со помнењето, може да се појават до десет, односно пет години пред дијагнозата. Исто така откриле две нови карактеристики на болеста – епилепсија и губење на слухот.
Иако раните знаци на Паркинсоновата болест се опишани претходно, тие студии главно биле фокусирани на помала група на пациенти. Оваа студија нуди дополнителни докази за ризик факторите и раните знаци на Паркинсоновата болест, за прв пат користејќи податоци од толку разнолика популација.
Истражувачите откриле ниту етничката припадност, ниту социо-економскиот статус не биле поврзани со зголемен или намален ризик од развој на оваа болест.
“Нашите резултати открија нови ризик фактори и рани симптоми: епилепсија и губење на слухот. Додека претходните истражувања најавија поврзаност, како епилепсијата која е почеста кај пациентите со Паркинсонова болест отколку кај општата популација, сега е потребно повеќе истражување за да можеме таа врска во целост да ја разбереме. Во меѓувреме, важно е лекарите од примарната здравствена заштита да бидат свесни за оваа поврзаност и да разберат колку рано може да се појават симптомите на болеста, со цел пациентите да можат да добијат навремена дијагноза и да почнат со третирање на оваа болест“, велат научниците.
