Ново истражување укажува на неочекувана врска помеѓу крвната група и ризикот од мозочен удар.
Крвната група е многу важна кога станува збор за здравјето, а ново истражување покажа дека луѓето со специфична подгрупа на крвна група А имаат поголема веројатност да доживеат мозочен удар пред 60-годишна возраст, пишува Science alert.
Откритието, објавено во научен труд од 2022 година, го продлабочува разбирањето за тоа како уникатниот биолошки состав на телото може да влијае на здравјето.
„Ова значајно и изненадувачко истражување го проширува нашето знаење за неменливите фактори на ризик за мозочен удар – вклучувајќи ја и крвната група на лицето“, рече д-р Марк Гладвин, лекар-истражувач на Универзитетот во Мериленд, кога беше објавена студијата.
Како крвната група влијае на ризикот
Веројатно сте слушнале за крвните групи А, Б, АБ и О, кои укажуваат на различни хемиски маркери, познати како антигени, на површината на црвените крвни зрнца. Дури и во рамките на овие главни групи постојат суптилни варијации предизвикани од генетски мутации.
Истражувачите анализирале податоци од 48 генетски студии, вклучувајќи околу 17.000 пациенти со мозочен удар и речиси 600.000 контролни испитаници без мозочен удар, на возраст од 18 до 59 години.
Нивните резултати покажаа јасна поврзаност помеѓу генот одговорен за подгрупата А1 и раниот мозочен удар.
„Бројот на луѓе кои доживуваат мозочен удар во рана фаза се зголемува“, рече водечкиот автор на студијата, васкуларниот невролог д-р Стивен Китнер од Универзитетот во Мериленд, додавајќи дека „овие лица имаат поголем ризик од смрт, а преживеаните може да живеат со последиците со децении“. И покрај ова, има малку истражувања за причините за раните мозочни удари.
Геномската анализа идентификуваше две места во генетскиот материјал кои се силно поврзани со поран ризик од мозочен удар, од кои едното се совпаѓа со локацијата на генот за крвна група.
Подетална анализа покажа дека луѓето чиј геном носи варијација на крвна група А имаат 16 проценти поголем ризик од мозочен удар пред 60-годишна возраст во споредба со луѓето со други крвни групи. За носителите на генот за крвна група О1, ризикот бил 12 проценти помал.
Сепак, истражувачите забележуваат дека дополнителниот ризик кај луѓето со крвна група А е мал и дека нема потреба од дополнителна грижа или посебен скрининг кај оваа група.
„Сè уште не знаеме точно зошто крвната група А носи поголем ризик“, вели д-р Китнер.
Како што наведува тој, „веројатно е поврзано со фактори на коагулација на крвта, како што се тромбоцитите и клетките што ги обложуваат крвните садови, како и други протеини во циркулацијата, од кои сите играат улога во формирањето на згрутчувања на крвта“.
Што значи ова во пракса?
Иако резултатите може да звучат алармантно, важно е да се стават во контекст: Секоја година во САД, околу 800.000 луѓе доживуваат мозочен удар, три четвртини од нив на возраст над 65 години, при што ризикот се дуплира на секои десет години по 55-годишна возраст.
Студијата вклучувала учесници од Северна Америка, Европа, Јапонија, Пакистан и Австралија, а лицата кои не се од Европа сочинуваа 35 проценти од испитаниците. Идните истражувања со поразновиден примерок може да помогнат подобро да се разбере оваа поврзаност.
