Р азликата меѓу сува и дехидрирана кожа тешко се препознава, со оглед на тоа дека симптомите се исти – сува, исперутана, чувствителна и кожа која чеша на телото и лицето.
Сувата кожа претставува тип на кожа, како што се и масната или мешаната кожа. Меѓутоа, за разлика од сувата кожа, дехидрираната кожа претставува состојба на кожата која може да биде присутна кај сите типови на кожа, па и кај масната и мешана кожа.
Појавата на сува кожа е предизвикана од недостаток на себум (масло), додека дехидрираната се појавува како последица од недоволен внес на вода.
Сувата кожа се карактеризира со чувство на грубост при допир, како и појава на лупење на одредени делови, додека дехидрираната кожа најчесто се препознава по недостаток на сјај, изразеност на ситните брчки и можност на брзо впивање на хидратантната крема или серум.
Што предизвикува дехидрација на кожата?
За разлика од сувата кожа со која се раѓа, дехидрираната кожа може да се појави повремено, зависно од различните фактори кои влијаат на неа. На пример дехидрација на кожата може да предизвика:
- Лоша исхрана
- Консумирање премногу алкохол и кофеин
- Консумирање на големи количини на сол
- Погрешни препарати за нега на кожа
- Изложеност на сонце, ветер, или клима
- Хлорирана вода
- Долготрајни и топли купки
- Стрес
Кога кожата е дехидрирана, почнува да создава повеќе себум, за да се надомести недостатокот на вода, па истовремено може да делува и масно и суво. Ако се препознаете во овој опис, обидете се да откриете што предизвикува дехидрација на вашата кожа и променете го тоа.
