Во Македонија бројот на заболени од астма се проценува на 80.000-100.000 лица. Податоците од Клиниката за пулмологија и алергологија во Скопје покажуваат дека бројот на новодијагностицирани и амбулантски прегледи на болни од астма е во пораст, односно во 2017 година бројот изнесувал 1403, а веќе наредната гдина 1450 нови случаи. Но, како што истакна на денешната прес конференција по повод Светскиот ден на астмата, директор на Клиниката за пулмологија, проф. д-р Дејан Докиќ, регистриран е пад на хоспитализирани пациенти од оваа болест.
“Хоспитализирани пациенти има се помалку, што укажува на полека, но сигурно остварување на целта во третманот на астмата, односно постигнување на целосна контрола на болеста. Така, во 2016 година хоспитализирани се 282 пациенти, во 2017 година 279 болни, додека минатата година бројката на пациенти изнесувала 260. Она што особено сакам да го нагласам е податокот дека во земјава досега нема ниту еден смртен случај како последица на астма“, истакна проф. д-р Докиќ.
Она на кое посебно укажаа лекарите е фактот дека и покрај редовната терапија кај пациентите може да се јават повторни симптоми на болеста.
“Секој пациент со астма треба да има свој акционен план со лекарот за да ги редуцура и олесни постоечките симптоми. Една е од тие алатки е т.н. АСТМА КОНТРОЛ ТЕСТ, кој е контролен тест и патоказ дали болеста се држи или не под контрола. Тука сакам да ја нагласам важноста и за самостојната контрола кај пациентот, односно да тој кога ќе се влошат симптомите да знае кој и во која доза треба да го користи препишаниот лек“, потенцира проф. д-р Горица Брешковска од Клиниката за пулмологија и алергологија.
Таа вели дека пациентите ја потценуваат астмата и мислат дека ќе помине и дека лековите се доволни, но од особена важност се и редовните контроли.
За значењето на земањето соодветна терапија, укажа и проф. д-р Бисерка Ќаева-Јовковска.
“Мал е процентот на тешки форми на астма кај нас, пред се поради постоењето на соодветна терапија. Но, пациентите имаат проблем со навремено подигање на препишаната терапија од причина што не можат лековите да ги најдат по аптеките. За овој проблем веќе е укажано до Фондот за здравство и очекуваме да инхалационата терапија, за овие пациенти се издвои од останатите лекови и пациентите да не губат време и енергија за нивно добивање. Се е залудно ако нема лекови“, подвлече проф. Ќаева-Јовковска.
Мултидисциплинарниот пристап е клучен за водење на проблемот со астма кај децата, оцени проф. д-р Катерина Ставриќ, директор на Клиниката за детски болести, според која честотата на појава на астма кај децата расте.
На денешното одбележување на Светскиот ден на астма – 6. Мај беа присутни и претставници од неколку здравствени установи и здруженија, од пулмолози, педијатри и матични лекари. Сите стручњаци упатија апел за зголемување на свеста за астмата, како кај гражаните така и кај здравствените работници и институции, со цел постигнување на добра контрола на болеста и подобрување на квалитетот на живот на пациентите и нивните семејства.
