Денес, 18. октомври, во светот се одбележува Светскиот ден на менопаузата за да се подигне свеста за влијанието што менопаузата може да го има на секојдневниот живот на жените.
ШТО Е МЕНОПАУЗА И ШТО ЈА ПРЕДИЗВИКУВА?
Менопаузата е природен процес кој се случува кога жените престануваат да имаат менструацијата и повеќе не можат да забременат по природен пат. Процесот на менопауза се одвива кога се менува нивото на хормони во телото на жената, наведува Британското здружение за менопауза.
“За време на плодните години на жената, нејзината способност секој месец да создава јајце клетки е поврзана со ослободување на три репродуктивни хормони (естрадиол, естрон и естриол) кои заедно се нарекуваат естроген“, објаснуваат лекарите.
“Како жените стануваат повозрасни, складирањето на јајце клетки во јајчниците станува се послабо и се намалува можноста за зачнување. Во овој момент се произведува помалку естроген, поради што телото се однесува поинаку“, потенцираат.
Лекарите додаваат дека не постои “јасна причина“ зошто некои жени доживуваат менопауза многу рано.
Менопаузата може да се појави и по различни медицински третмани, вклучувајќи хируршко отстранување на едниот или двата јајчници, хемотерапија, радиотерапија и лекување на рак на дојка.
НА КОЈА ВОЗРАСТ ЖЕНИТЕ ДОЖИВУВААТ МЕНОПАУЗА?
Менопаузата обично се јавува кај жени на возраст помеѓу 45 и 55 години.
Ако жена помлада од 40 години доживее менопауза, станува збор за предвремена менопауза, велат експертите од Кралскиот колеџ за акушери и гинеколози.
Предвремена менопауза се јавува кај приближно една од 100 жени.
КОИ СЕ СИМПТОМИТЕ НА МЕНОПАУЗА?
Иако симптомите на менопауза може да се појават во текот на неколку месеци, жената по дефиниција е во менопауза откако немала менструација 12 месеци. Иако не сите жени ќе ги почувствуваат истите симптоми, најчестите се:
- Топли бранови
- Несоница
- Сувост на вагината
- Намален сексуален нагон
- Лошо расположение
- Анксиозност
- Ноќно потење
- Непријатност за време на сексот
- Потешкотии со концентрацијата
- Проблеми со меморијата
Пред да доживеат менопауза, жените може да доживеат и порана фаза која се нарекува перименопауза, а симптомите може да бидат слични.
Лекарите нагласуваат дека симптомите на менопауза може да траат околу четири години од последната менструација, а некои симптоми траат и подолго.
ЗНАЦИ НА ПРЕДВРЕМЕНА МЕНОПАУЗА
Ова се само некои типични симптоми кои упатуваат на ран почеток на менопауза. Ако ве загрижуваат, најдобро е да поразговарате со гинеколог.
- Неправилност во доаѓањето на месечниот циклус
- Бранови топлина
- Вагинална сувост
- Промени на расположението
