Депресијата е болест која се карактеризира со пореметувања на расположението. Во просек, проценува Светската здравствена организација, околу 300 милиони луѓе во светот боледуваат од депресија. Во земјава нема точна статистика колку луѓе страдаат од ова најчесто ментално пореметување.
СИМПТОМИ НА ДЕПРЕСИЈА СЕ:
- Долготрајна тага
- Неспособност за уживање во претходно пријатни работи или активности
- Душевна болка
Депресијата влијае на извршувањето на наједноставните секојдневни задачи, понекогаш со разорни последици за односите со семејството и пријателите и можноста да се заработи за живот. За да се постави дијагноза на депресија, односно депресивна епизода, овие симптоми треба да траат најмалку две недели.
Освен наведеното, луѓето кои боледуваат од депресија може да имаат и некои од следниве симптоми:
- Недостаток на енергија
- Промени во апетитот
- Несоница или преголема потреба за сон
- Зголемена вознемиреност или загриженост
- Намалена концентрација
- Неодлучност
- Немир
- Чувство на безвредност, вина или безнадежност
- Мисли за самоповредување или суицид
Ризикот од развој на депресија се зголемува со стресот, трауматски животни случувања како што се смрт на сакано лице или прекин на врска, физички болести, проблеми предизвикани од консумирање на алкохол или дрога, сиромаштија, невработеност, неправилна исхрана или недоволна физичка активност. Кај некои лица постои и генетска, вродена предиспозиција за развој на депресија.
Депресијата може да го погоди секој, тоа не е знак на слабост. Депресијата е излечива: разговор со психотерапевт, антидепресивни лекови или комбинација на двете.
