Неделниот број на заразени со коронавирус во светот се зголеми за прв пат од крајот на јануари, објави вчера Светската здравствена организација.
Во втората недела од март бројот на новозаразени е за осум отсто поголем во однос на претходната недела. Во седмицата од 7. до 13. март, пријавени се повеќе од 11 милиони нови случаи на КОВИД-19 и 43.000 смртни случаи од КОВИД-19 или со КОВИД-19.
Раст на бројот на случаи во однос на претходната недела е забележан особено во регионите на западниот Пацифик, 29 отсто и Африка, 12 отсто. Во Европа е забележан неделен пораст од два проценти.
Бројот на случаи е намален во источниот Медитеран, југоисточна Азија, како и во Северна и Јужна Америка.
Вкупниот број на потврдени заразени со новиот коронавирус од почетокот на пандемијата достигна 455 милиони, а евидентирани се шест милиони смртни случаи.
