Епидемија на вирусното заболување – мајмунски сипаници, беше прогласена во мај 2022 година, а два месеци по нејзиното избивање, регистрирани се повеќе од 6.000 заразени лица. Комитетот за итни случаи на Светската здравствена организација утврди дека во моментов не ги исполнува критериумите за прогласување вонредна состојба во јавното здравство, но генералниот директор на СЗО Тедрос Аданом Гебрејесус сака Комитетот повторно да го разгледа ова прашање. Поттикнат од новите податоци за епидемијата и еволуцијата на нејзиното појавување, тој планира да го свика Комитетот.
“И понатаму сум загрижен поради размерот и ширењето на вирусот. Низ светот сега се регистрирани повеќе од 6.000 случаи во 58 земји“, изјави генералниот директор на СЗО, додавајќи дека проблем претставува тестирањето на вирусното заболување, како и бројот на неевидентирани случаи.
“Европа е моментален епицентар на епидемијата, со повеќе од 80 проценти од случаите во светот“, рече Гебрејесус.
Бројот на случаи на мајмунски сипаници продолжува да расте на глобално ниво, а случаи се пријавени и во африканските земји кои претходно не биле погодени од вирусот. Генералниот директор на СЗО порача дека Организацијата внимателно ги следи сите податоци и соработува со земјите и производителите на вакцини за координирање на дистрибуцијата на вакцините, кои се малку.
