СЗО ја предводи глобалната иницијатива за развој на безбедна и ефикасна вакцина, тестови и лекови за превенција, дијагностицирање и лекување на КОВИД-19, респираторна болест од која досега заболеа 4,19 милиони лица во светот.
“Имаме некои лекови кои во многу рана фаза на испитувањето ја намалуваат тежината и траењето на болеста, но немаме ништо што може да го убие и стопира вирусот“, изјави портпаролката Маргарет Харис.
“Некои од нив покажуваат потенцијално позитивни резултати, но ни се потребни повеќе податоци за да со стопроцентна сигурност може да кажеме дека еден лек е подобар од друг“, додава таа.
Харис не наведе за кои лекови станува збор, нагласувајќи дека треба да се биде внимателен кога се работи за очекувањата од вакцината, бидејќи коронавирусите се “многу незгодни вируси против кои е тешко да се пронајде вакцина“.
Во моментов се развиваат повеќе од стотина различни вакцини за КОВИД-19, од кои некои се во клиничка фаза на испитување. Според СЗО за пронаоѓање на вакцина ќе бидат потребни најмалку 12 месеци.
