Епидемијата на мајмунски сипаници продолжува да претставува глобална здравствена криза, што е највисоко ниво на предупредување на Светската здравствена организација (СЗО), објави вчера Кризниот комитет на агенцијата на ОН.
Ознаката на СЗО – “Јавноздравствена криза од меѓународен интерес (PHEIC)“, е осмислена за да поттикне координиран меѓународен одговор и да ослободи ресурси за соработка при споделувањето вакцини и лекување.
СЗО во јули објави дека брзото ширење на мајмунските сипаници претставува глобална здравствена криза.
Мајмунските сипаници обично започнуваат со симптоми слични на грип како треска, силна главоболка и отекување на лимфните јазли. По еден до три дена се јавува осип на лицето и телото, кој најпрво се манифестира во вид на рамни лезии, а завршува во вид на гнојни јазли.
Симптомите може да траат две до четири недели. Мајмунските сипаници може да бидат смртоносни, но според СЗО, стапката на смртност варира во голема мера од сој до сој, од речиси нула до дури 11 проценти.
