СЗО (Светската здравствена организација) објави 26 нови препораки за бремените жени, во кои особено предупредува на зголемување на бројот на медицински интервенции, како што е царскиот рез, кои не се секогаш неопходни.
„Во последните две децении имаме се повеќе медицински интервенции кои се непотребни за родилките“, вели Олуфеми Оладапо од Канцеларијата на СЗО за репродуктивно здравје и истражувања.
„Во неколку региони во светот станаа многу застапени зафатите како што е царскиот рез или употреба на окситоцин за да се забрза породувањето“, додава Оладапо, зборувајќи за синтетизираниот облик на природниот хормон, кој во некои делови на светот рутински им се дава на родилките интравенозно за да се предизвикаат контракции, да се забрза раѓањето и да се избегнат компликации.
СЗО објави дека досегашните истражувања покажале дека процентот на деца родени со царски рез од 10 до 15 проценти не води кон намалување на стапката на смртност на мајката или детето.
„Меѓу средно развиените земји, како што се Турција, Кина, земјите на Латинска Америка и Иран, постои висока стапка на царски резови, „често без вистинска причина“, вели официјалниот претставник на СЗО, Метин Гулмезоглу.
Оладапо, пак, нагласува дека жените треба да бидат слободни да изберат какво породување сакаат, како и да им се обезбедат лекови против болки.
„Сакаме да создадеме услови во кои жените се добро информирани и во кои се вклучени во донесувањето одлуки врзани за породувањето“, вели Оладапо.
