Светската здравствена организација (СЗО), објави попис на најголемите закани за човечкото здравје за 2019 година, а освен грипот, ракот и останатите опасни заразни и незаразни болести, на листата се најдоа и противниците на вакцинацијата.
“Со вакцините секоја година се спречуваат два до три милиони смртни случаи, но таа бројка би можела да биде многу поголема. Дополнителните милион и половина лица би можело да бидат спасени, ако имунизацијата е на повисоко ниво„, велат од СЗО.
Загаденост на воздухот и климатски промени
Девет од 10 лица вдишуваат нечист воздух. СЗО верува дека загадениот воздух ќе биде најголема закана од околината за нашето здравје.
Непреносливи и хронично неизлечиви болести
Овој тип на болести, кој вклучува дијабетес, карциноми и кардиоваскуларни болести, е виновен за 70% од сите смртни случаи во светот, што годишно изнесува 41 милион лица.
Глобална пандемија на грип
Според предвидувањата на СЗО, оваа година човештвото ќе го погоди пандемија на грип, но никој не знае каков ќе биде размерот, ниту каде ќе се случи.
Подрачја со ниска здравствена нега поради условите на живот
Повеќе од 1,6 милијарди лица или околу 22% од вкупната светска популација има многу слаба здравствена нега. Пред се, поради лошите животни услови.
Отпорност на вирусите и бактериите на лекови
Развојот на антибиотици, антивирусни и други лекови е еден од најголемите светски успеси, но проблем претставува способноста на вирусите и бактериите да станат отпорни на таквите лекови.
Ебола и слични патогени
Само минатата година во Демократската Република Конго се случија две пандемии на ебола, кои беа потенцијално погубни за околу еден милион лица.
Лоша основна здравствена заштита
Квалитетена основна здравствена заштита се уште не е достапна во многу земји, а нејзиниот развој, според предвидувањата на СЗО, би требало да биде во фокусот на медицинските институции ширум светот.
Противници на вакцинацијата
Годишно, со вакцинацијата се спречуваат два до три милиони смртни случаи, а таа бројка може да биде многу поголема, велат од СЗО. Тие додаваат дека главни причини поради кои луѓето се премислуваат и не се вакцинираат е рамнодушноста и недостатокот на доверба. Во САД оние кои прескокнуваат вакцинација за себе или за децата, често наведуваат дека тоа се должи на верски причини или погрешно толкување дека вакцините доведуваат до појава на аутизам. Центрите за контрола на болести велат дека не постои научна врска помеѓу вакцинацијата и аутизмот.
“Ако престанеме да се вакцинираме, се повеќе деца ќе умираат. Ќе се вратат болестите кои речиси и сме ги заборавиле дека постојат. Во последниве години, откако луѓето почнаа да одбиваат вакцинација, повторно се појавија болести како детска прализа и сипаници, кои се сметаа за искоренети во земјите во кои вакцината е лесно достапна“, потеницраат од СЗО.
Денга треска
Денга треската е најраспространета вирусна болест што ја пренесуваат комарците. Може да биде смртоносна, а умираат околу 20% од заболените пациенти. СЗО наведува дека 40% од светската популација е во ризик од заболување, а годишно се заразуваат околу 390 милиони лица.
ХИВ
СЗО истакнува дека секоја година од овој вирус умираат околу еден милион лица, а откако е појавен со него се заразени речиси 70 милиони пациенти.
