НЕДОВОЛНАТА ФИЗИЧКА АКТИВНОСТ Е ГЛОБАЛЕН ПРОБЛЕМ
Повеќе од една четвртина од светското население или околу 1,4 милијарди возрасни лица недоволно вежбаат, поради што се подложни на зголемена опасност од развој на кардиоваскуларни болести, дијабетес тип 2, деменција и рак, покажале резултатите на студијата, спроведена од Светската здравствена организација (СЗО).
Во 2016 година, на глобално ниво, секоја трета жена и секој четврти маж не ги следеле препораките за физичка активност, кои предвидуваат најмалку 150 минути умерено или 75 минути интензивно вежбање неделно.
Од 2001 година не е забележано подобрување на физичките активности на глобално ниво, покажала студијата спроведена од истражувачите на СЗО. Резултатите се објавени во стручниот магазин „The Lancet Global Health“.
Според собраните податоци, најниското ниво на вежбање било забележано во Кувајт, Самоа, Саудиска Арабија и Ирак, каде што повеќе од половина од возрасните лица не се физички доволно активни за на тој начин да го заштитат своето здравје.
„За разлика од другите глобални здравствени ризици, податоците за недоволната физичка активност во просек во светот не се менуваат на подобро. На глобално ниво, повеќе од една четвртина од возрасните лица не се придржуваат кон препорачаните упатства кога станува збор за физичката активност и вежбањето“, изјавила коавторката на истражувањето Реџина Гутхолд од СЗО.
Резултатите презентирани од страна на Организацијата укажуваат на тоа дека недоволната физичка активност е еден од водечките фактори на ризик за предвремена смрт низ целиот свет. Го зголемува ризикот од хронични незаразни болести како што се кардиоваскуларните болести, ракот и дијабетесот.
Со зголемена физичка активност лесно и релативно брзо се гледаат придобивките од вежбањето: на пример, се подобруваат кардиореспираторните способности, мускулната сила и издржливост, здравјето на коските, балансирана тежина и намалување на ризикот од зголемен крвен притисок, срцеви заболувања, мозочен удар, дијабетес, појава на депресија и повеќе видови на рак
Намалената или никаква физичка активност е повеќе од двојно присутна во земјите со повисоки приходи во споредба со посиромашните земји. Од 2001 до 2016 година, во богатите земји, таа е зголемена за само 5 отсто.
- Во индустриски развиените и богати земји, сметаат истражувачите, постојат се повеќе седечки работни места, но и седечки начини на рекреација и превоз, со што се објаснува податокот за поголем број на физички неактивни лица.
СЗО ги повикува владите да ги земат предвид овие податоци и да обезбедат соодветна инфраструктура, која ќе промовира одење, пешачење или возење велосипед кога станува збор за превоз, како и активно занимавање со спорт и рекреација.
