По години пад на бројот на случаи на болеста, туберкулозата е во огромен пораст, усмртувајќи проценети 1,6 милиони луѓе во 2021 година, што е зголемување за 14 отсто за две години, покажале новите податоци на Светската здравствена организација (СЗО). Туберкулозата однесе околу 1,5 милиони животи во 2020 година и 1,4 милиони во 2019 година.
СЗО ја обвини пандемијата со коронавирус за повторниот раст на бројот на случаи на болеста, бидејќи кризата што ја следеше болеста КОВИД-19 имаше големо и трајно влијание врз пристапот до дијагностика и лекување.
“Глобално, годишниот проценет број на смртни случаи од туберкулоза опадна помеѓу 2005 и 2019 година, но проценките за 2020 и 2021 година сугерираат дека овој тренд е обратен“, објави здравствената агенција на ОН во својот годишен извештај.
Најголем дел од проценетиот пораст на смртните случаи од туберкулоза се случува во четири земји: Индија, Индонезија, Мјанмар и Филипините.
Во извештајот се наведува дека е можно туберкулозата “повторно да биде водечка причина за смрт во светот од некој инфективен агенс, заменувајќи го КОВИД-19“.
Мел Спигелман, претседател на здружението за туберкулоза вели дека тоа веќе се случило, споредувајќи ја годишната стапка на смртност од туберкулоза со најновите бројки на КОВИД-19.
Се проценува дека 10,6 милиони луѓе заболеле од туберкулоза во 2021 година, што е зголемување за 4,5 отсто во споредба со 2020 година, објави СЗО.
“Ова е првпат по многу години да е пријавено зголемување на бројот на заболени од туберкулоза и туберкулоза отпорна на лекови“, наведува СЗО.
Стапката на инциденца, нови случаи на 100.000 луѓе годишно, е зголемена за 3,6 отсто помеѓу 2020 и 2021 година, по падот за околу два отсто годишно во поголемиот дел од изминатите 20 години.
“Главниот заклучок од овој извештај е дека ковид пандемијата продолжува да има штетно влијание врз пристапот до дијагноза и лекување на туберкулоза и товарот што го претставува оваа болест. Напредокот постигнат во годините до 2019 година е забавен, запрен или обратен, а постигнувањето на глобалните цели во борбата против туберкулозата веќе не е на дофат. Итно се потребни засилени напори поддржани со зголемено финансирање за да се ублажат и да се сменат негативните ефекти од пандемијата на туберкулоза“.
Туберкулозата ја предизвикува бактерија која најчесто ги зафаќа белите дробови. Како ковид, се шири преку воздухот од заразени луѓе, на пример со кашлање. Може да се спречи и излечи.
СЗО проценува дека конфликтите ширум светот, глобалната енергетска криза и поврзаните ризици за безбедно снабдување со храна веројатно дополнително ќе ја влошат ситуацијата.
