Летувањата и патувањата се прекрасно искустви под услов месечниот циклус да не донесе непријатности баш кога треба да се опуштиме и да уживаме. Според резултатите од една понова студија, 17 проценти од жените признале дека користат хормонска контрацепција за да ја одложат менструацијата.
Истражувачите од Универзитетот во Орегон анкетирале 1374 студентки кои користеле комбинирана хормонска терапија во последните шест месеци. Половината од нив сакале да немаат грижи на одмор, додека останатите имале помалку вообичаени причини вклучително и лични преференци илиу сузбивање на ПМС.
Но колку е ова безбедно и на кој начин се користат овие таблети?
Одложувањето на циклусот е особено популарно во летните месеци. Најлесно е да се програмира ако се користат таблети за контрацепција, односно се продолжува земањето таблети и на тој начин се одложува циклусот.
Таблетите се земаат два до три дена пред предвидениот датум за циклус и тоа во доза 2х1 онолку дена колку што е потребно да се биде без циклус. После последната таблета во рок од 3 до 5 дена следува циклусот. Овие таблети делуваат само онолку колку што се пијат и немаат понатамошно влијание на циклусот и хормоналниот статус. Се разбира, со земањето таблети за одложување не значи дека менструацијата во целост ќе изостане. Многу жени имаат мали крвавења, што не е штетно по здравјето, а, веројатно, може да се случи кај жени кои штотуку почнале со овој метод.
Земањето на овие таблети не треба да биде на своја рака, туку исклучиво по консултација со вашиот гинеколог. Ова особено се однесува на жените постари од 35 години, пушачите или оние кои имаат висок притисок. Овие фактори може да го зголемат ризикот од крвни згрутчувања, мозочен или срцев удар, па така би требало да бидете исклучително внимателни ако спаѓате во една или повеќе од овие категории.
