Жените кои слабо се движат, се посклони при активирањето на тромбоцитите од жените кои се во добра телесна форма. Ова е главниот резултат од студијата на Медицинскиот Универзитет во Виена и Институот за спортска наука спроведена на 62 млади жени.
Активирањето на тромбоцитите (крвни плочки) може да доведе до создавање на многу опасни тромбови. Тие пак може да предизвикаат запушување на крвните задови, односно тромбоза која доведува до недоволно снабдување на органите со крв. Виенските научници во рамките на својата студија утврдиле дека зголемената телесна активност многу брзо може да доведе до нормализирање на функцијата на тромбоцитите – за тоа е доволно во текот на два месеци, три пати неделно да се спроведуваат поинтензивни тренинзи.
Истражувањата докажале дека и умерената телесна активност за релативно кратко време може да доведе до позитивни ефекти, односно до изедначување на вредностите за активација на тромобоцитите. Резултатите, освен ова, го потврдиле и веќе познатиот факт дека лицата што се занимаваат со спорт, имаат за 40% помал ризик да заболат од кардиоваскуларни болести. Резултатите од оваа студија се објавени во водечкото светско медицинско списание „Medicine & Sciene in Sport & Exercise”.
