Честопати за кафето се зборува како за пијалак, кој има свои предности и позитивни ефекти врз здравјето, но последното истражување ја покажува неговата „темна“ страна.
Имено, резултатите од студијата покажале дека повеќегодишната консумација на кафе би можела негативно да влијае на симптомите на Алцхајмеровата болест. Всушност, честата употреба на кофеин предизвикува проблеми во однесувањето и анксиозност.
Водичот на истражувањето д-р Лидија Хименез Лорт од Универзитетот „Autonoma de Barselona“ во Шпанија ги објави резултатите во списанието „Frontiers in Pharmacology“.
Најчестиот симптом на Алцхајмеровата болест е губење на меморијата, но, исто така, треба да се земат предвид и другите симптоми, како што се халуцинации, вознемиреност, раздразливост и депресија.
Иако претходните истражувања покажале дека кафето може да го намали ризикот од заболувањето, за луѓето кои се веќе заболени од Алцхајмерова болест, кофеинот нема такво дејство, вели Хименез Лорт.
Истражувањето било спроведено на глувци, кои развиваат Алцхајмерова болест на многу сличен начин како и луѓето.
„Не само што имаа типични когнитивни проблеми, туку и многу симптоми на деменција, така што е од суштинско значење да се утврди дали придобивките од кофеинот може да ги компензираат негативните ефекти“, вели еден од авторите на студијата Ракет Баета Корал.
Во тринаесетмесечното истражување на глувците им биле тестирани когнитивно-бихевиоралните способности. Кај глувците кои консумирале вода со кофеин била забележана анксиозност, неофобија и страв од непознати предмети и ситуации, за разлика од глувците кои пиеле обична вода.
Покрај тоа, тие откриле дека кофеинот не влијае толку поволно на учењето и меморијата кај глодарите.
„Дојдовме до сознанија дека кофеинот, всушност, има повеќекратни ефекти. Кафето, во суштина, повеќе им пречи на когнитивните функции отколку што ги поттикнува“, изјавила Хименез.
