Тениски лакт (латерален епикондилитис) – причини, симптоми и лекување

Болките во лактот предизвикани од тениски лакт често поминуваат со текот на времето, но ако лековите против болка и другите мерки на самопомош не помагаат, лекарот може да предложи физикална терапија, а во потешки случаи и операција.

Латералниот епикондилитис или тениски лакт е болна состојба која настанува кога тетивите во лактот се преоптоварени, обично заради повторувачки движења на зглобот и раката. Во основа се работи за силни, монотони и долго употребувани потези на мускулите, кои го оптоваруваат латералниот епикондил како место на нивниот припој. Tенискиот лакт може да се јави како резултат на играње тенис, најчесто при тениски бекхенд, но и кај многу други занимања, кај кои, исто така, вообичаени се повторувачките движења на зглобот и раката (на пример, кај фрлачите на копје, хокеарите, мечувалците, дактилографите, хирурзите, стоматолозите…). Болката која ја предизвикува тенискиот лакт се јавува првенствено на местото каде тетивите во подлактицата се спојуваат со коскените нерамнини на надворешната страна од лактот. Болката, исто така, може да се шири и во подлактицата и рачниот зглоб. Болеста најчесто се јавува меѓу 30 и 50 година од животот. Ако конзервативните третмани не помагаат или ако симптомите ве оневозможуваат во вообичаените активности, решение може да биде хируршки зафат.

 

Симптоми на тениски лакт

Болката поврзана со тениски лакт може да се шири од надворешната страна на лактот кон подлактицата и рачниот зглоб. Болката и слабоста можат да отежнат некои основни активности, како ракување, отворање врата или држење филџан, чаша… На почетокот симптомите се со послаб интензитет, а ако болеста не се третира, тогаш болката станува се поинтензивна. Таквата болка може да го оневозможи обавувањето на секојдневните активности и да го наруши квалитетот на живот. Симптомите на тениски лакт по својата природа се најслични на симптомите на радијален тунел, разликата единствено е во местото на создавањето на болката. Некои од симптомите кои можат да се појават ако патите од тениски лакт се:

  • Болка на надворешната страна на подлактицата, под зглобот на лактот. 
  • Болка предизвикана со виткање или подигање на раката. (може да трае само за време на некои активности или константно). 
  • Чувствителност на допир во пределот на лактот.
  • Подлактицата е тешко или невозможно да се исправи без да се почувствува болка. 
  • Тенискиот лакт може да резултира со отечени зглобови.

Ако мерките за самопомош како одмор, мраз, лекови против болки… не даваат резултат, појдете на лекар.

Причини за тениски лакт

Тенискиот лакт е болен синдром кој настанува како резултат на прекумерно напрегање на мускулите. Причина се повторените контракции на мускулот на подлактицата, што се користи кога се крева и исправува раката. Повторените движења можат да доведат до воспаленија или низа ситни повреди во тетивите, па и до појава на болка во лактот. Како што и самото име сугерира, тенискиот лакт најчесто се јавува кај тенисерите, посебно кај лоши техники на бекхенд, но и други вообичаени движења можат да резултираат со овој синдром, а кои вклучуваат користење на разни алатки.

Лекување на тениски лакт

Болките во лактот предизвикани од тениски лакт често поминуваат со текот на времето, но ако лековите против болка и другите мерки на самопомош не помагаат, лекарот може да предложи физикална терапија, а во потешки случаи и операција. За почеток доволно е да се отстрани причината која ја предизвикува болката, односно да се имобилизира зглобот и да се прават вежби за истегнување на тетивите и соодветните мускули. Исто така, лекарот може да ви предложи и вежби со кои ќе ги зајакнете мускулите, а особено мускулите на подлактицата. Ако е потребно, може да се предложи носење протеза. Ако симптомите не се подобруваат и после најмалку една година опсежна конзервативна терапија, може да сте кандидат за операција со која се отстранува оштетеното ткиво. Овој вид постапка може да се изврши со еден голем рез или повеќе помали. Вежбите за рехабилитација за болка во лактот се клучни за опоравување.

 

Операција на тениски лакт

Резултатите од операцијата се многу подобри кај кандидатите кои мака мачат со болките во лактот и коишто порано ќе се решат за овој чекор. Видот на операција зависи од стадиумот на болеста и обемот на оштетеното ткиво. Зафатот обично се работи под локална анестезија, а подразбира рез до 2,5 сантиметри. Ако пациентот во потполност се придржува до сите мерки предвидени за периодот на опоравување, не би требало да дојде до рецидиви.



Самопомош

Самопомошта кога е во прашање тенискиот лакт доаѓа предвид единствено кога можете да ја отстраните почетната причина – повторување на некаква активност. А таа вклучува:

Одморање на лактот: Вашиот лакт би требало да се одмора, но не би требало да се одбегнуваат сите активности. Понекогаш носење на имобилизатор може да помогне при намалување на утринските симптоми.

Мраз: Облоги со мраз или ладна вода можат да помогнат за да ги намалите отоците после повреда, затоа обидете се со мраз.

Компресија: Со еластичен завој завиткајте го болното подрачје.

Држете го лактот над нивото на срцето: Се разбира, кога е возможно затоа што така ќе ги спречите и ограничите отоците.

Во ублажувањето на болките можат да помогнат и некои креми со разладувачки ефект.