Британската влада вчера соопшто дека ќе ги подржи своите научници кои во рамките на тестирањето на вакцина против КОВИД-19 планираат намерно да заразат млади и здрави доброволци со вирусот за да го забрзаат развојот.
Британските научници, истражувањето го претставија како прво такво во светот.
Целта на истражувачкиот тим кој го води Империал Колеџот е со употреба на строго контролирани дози од вирусот да ја открие најмалата количина вирус потребна за предизвикување на инфекција со КОВИД-19 на помали групи здрави млади волонтери на возраст од 18 до 30 години, кај кои ризикот од тешки последици е најмал.
Целта на оваа фаза е да се утврди колкава е количината вирус која предизвикува симптоми кај некое лице, објавија научниците од Империал Колеџот. Потоа ќе се проучува “на кој начин делува вакцината во стопирање или спречување на развојот на КОВИД-19 и ќе се следи имунолошката реакција на организмот“.
“Приоритет ни е безбедноста на волонтерите. Мојот тим изведува слични студии со респираторни вируси повеќе 10 години. Ниту една студија не е во целост без ризик, но ќе работиме на тоа да загарнтираме што е можно помал ризик“, изјави д-р Крист Чају, кој го води истражувањето.
Доброволците ќе бидат заразени “низ носната шуплина, по природниот пат“ преку кој вирусот влегува во организмот.
Во истражувањето најверојатно ќе учествуваат околу 90 волонтери, кои ќе мора да престојуваат во лабораторија 20 дена.
