Дали размислувате во распоредот на активности да додадете возење со велосипед? Поубава одлука не би можеле да донесете! Медицинскиот факултет на Универзитетот Харвард, на својата интернет страница издвои пет важни придобивки од дружењето со велосипедот. Одиме по ред!
- Ги штити зглобовите
Кога возите велосипед, ја пренесувате целата тежина на силните коски на карлицата. Кога одите или трчате, тежината се префрлува на нозете поради што страдаат зглобовите. Возењето велосипед е добро за сите луѓе кои имаат проблеми со болки во зглобовите или артритис, вели д-р Клер Сафран-Нортон од харвардската „Brigham and Women’s Hospital“.
- Обезбедува аеробно вежбање
Аеробните вежби се карактеризираат со умерен интензитет и првенствено се насочени кон подобрување на нашето здравје. Токму возењето велосипед е одлична форма на аеробнa вежба поради вртењето со педали, кое ја подобрува работата на нашето срце и мозок, и одлично делува врз кардиоваскуларниот систем. Исто така, го стимулира и излачувањето на ендорфинот (познат и како хормон на среќата), кој го подобрува нашето расположение.
- Ги зајакнува мускулите
Кога возиме велосипед, ги користиме речиси сите мускули. Поради исправената положба „работат“ и стомачните мускули кои помагаат во балансирањето, а исто така, ги користиме и мускулите на рацете и рамената.
- Ги олеснува различните дневни активности
Придобивките на возењето велосипед се пренесуваат на одржување на рамнотежата, одење, стоење, издржливост и качување по скали, вели д-р Сафран-Нортон. Сите видови на физичка активност ќе станат полесни благодарение на возењето велосипед.
Возењето велосипед го стимулира и излачувањето на ендорфинот (познат и како хормон на среќата), кој го подобрува нашето расположение
- Помага во зајакнување на коските
Д-р Сафран-Нортон вели дека активностите како што се вртење на педалите при кои телото мора да пружа отпор ја зголемуваат густината на коските. Намалената густина не е занемарлив проблем, бидејќи може да доведе до остеопороза. Медицинската школа на Универзитетот Харвард советува пред почетокот на интензивно возење велосипед да поразговарате со својот доктор, доколку имате проблеми со срцето, артритис или тенки коски. Ако имате остеопороза, размислете за возење велосипед на три тркала, кој е многу постабилен од велосипед. Ако неодамна сте имале фрактура, немојте да возите велосипед, додека не се опоравите, бидејќи нов пад би можел да ја влоши постоечката повреда, смета д-р Сафран-Нортон.
