Вежбањето вообичаено го загрева целото тело, а во теретана се „варите“ во зима, а камоли сега, на овие летни температури. Но токму високите температури не се причина да се откажете од активниот живот. Познатиот личен тренер Енди Винсент од Лондон за „Дејли мејл“ открива неколку трикови со кои ќе ги преживеете напорните тренинзи дури и на најголема вруќина.
Утрински пијалак
Треба да пиете вода пред, за време и по вежбањето за да останете хидрирани цело време. Додека вежбате, телото се обидува да се разлади преку потење, поради што губите многу течност, соли и електролити, како што се калиум и натриум. Наутро подгответе си топла вода со лимон и сол и тоа нека биде вашиот прв пијалак. На тој начин ќе ги надоместите загубените електролити. Ако не можете да поднесете лимон и сол на гладно, постојат и таблети натриум, калиум и витамин Ц.
Што да јадете?
Винсент препорачува намирници со висок процент на вода, кои ќе ви помогнат да останете хидрирани. Јадете повеќе лиснат зеленчук бидејќи содржи до 80 проценти вода. Јагоди, краставици, ајсберг салата, целер, домати, пиперки и лубеници имаат многу повеќе вода отколку кое било друго овошје и зеленчук. За појадок, јадете јаткасти плодови и месо за да внесете доволно протеини.
Белото месо и јаткастите плодови во комбинација докажано го зголемуваат нивото на креатин во телото, а тоа ви дава издржливост за вежбање
Планирање на тренингот
Вежбајте рано наутро или доцна навечер за да ја избегнете најголемата жештина. Поделете го тренингот на неколку пократки делови. Повеќекратното вежбање на сонце во никој случај не е добра идеја. Порадо изберете 15 до 25 минути тренинг со висок интензитет, каде што ќе го достигнете вашиот максимум за кратко време. Циклусите на интензивен аеробен тренинг со кратки паузи докажано најдобро го топат салото, но и го забрзуваат метаболизмот, што значи дека продолжувате да трошите калории дури и откако вежбањето ќе престане.
Кога е доволно
Важно е да ги знаете своите граници и да ги препознаете сигналите дека ви треба одмор. Ова подразбира рани знаци на дехидрација. Тогаш треба да го паузирате тренингот и да се напиете вода. Ако почувствувате вртоглавица или слабост, застанете и одморете се на подот неколку минути. Не се форсирајте и осигурајте му на своето тело паузи во правилен интервал за да може да се олади и опорави.
