Симнувањето на вишокот килограми кај дебелите возрасни лица со атријална фибрилација може да доведе до подобрување на состојбата на нивната болест, покажала новата студија. Имено, резултатите покажале дека намалувањето на телесната тежина за 10 проценти може да доведе до значително ублажување на атријалната фибрилација.
Се смета дека губењето на тежината е од суштинско значење, бидејќи дебелината придонесува за многу фактори на ризик за атријална фибрилација, како што се висок крвен притисок, дијабетес и ноќна апнеја.
Инаку, и некои претходни студии покажаа дека намалувањето на телесната тежината може да ги ублажи симптомите на атријална фибрилација и да го намали ризикот од нови епизоди на атријална фибрилација. Но, оваа студија е прва што покажува дека може да се промени текот на болеста.
Треба да се напомене дека пациентите со атријална фибрилација кои сакаат да ослабат треба да бидат внимателни при изборот на диета
Имено, одредени диети може да бидат опасни за луѓето со атријална фибрилација, бидејќи нерамнотежата на хранливи материи како што се калиум и магнезиум може да предизвика нарушувања на срцевиот ритам.
Истражувачите сметаат дека за симнување на прекумерните килограми доволно е да се намали големината на порциите и внесот на шеќер, а да се зголеми консумацијата на зеленчук, пишува „Europace“.
