Воспалението на синуси понекогаш може да биде мошне болно и придружено со чувство на притисок во синусите. Кај овие тегоби многу можат да помогнат инхалациите – во сад со 200 мл провриена вода сипете 3 капки етерично масло од еукалиптус и вдишувајте ја пареата во текот на 10 минути. За време на инхалацијата лицето би требало да биде на оддалеченост од 30 см од чинијата, со затворени очи. Место еукалиптус можете да користите и етерични масла од босилек, рузмарин лаванда или нане, а за инхалирање, исто така, можете да користите и чај од споменатите лековити билки.
Идеално би било после инхалацијата на челото и образите да ставите топла облога, на пример, врел, мокар пешкир (добро исцедете го и внимавајте да не се изгорете). Топлината ќе ја поттикне циркулацијата и со самото тоа и исфрлањето на секретот од носот и синусите. Топлите облоги најдобро е да се користат три пати на ден во траење од по 5 минути.
Можете да користите и облога од крупна морска сол. Сипете 200-300 г сол во чиста памучна чорапа која ќе ја загреете потоа во тава на тивок оган. Повремено протресете ја чорапата за да се загрее рамномерно. Облогата би требало да биде мошне топла, но не и да пече на допир. Исто така, после инхалирањето и употребата на топлите облоги затоплете се и не излегувајте на ладно.
Топлите облоги не ги користете доколку имате зголемена телесна температура!
