Секој ден со мали деца носи нови прашања и дилеми. Дали е нормално бебето многу да плаче, дали е нормално воопшто да не плаче, треба ли да има столица три пати на ден или да нема столица три дена… Една од збунувачките и загрижувачки ситуации за родителите е и појавата на траги на крв во пелената на бебето. Дали е тоа нормално?
Повременото појавување на траги од крв во пелените на новороденчето не е причина за тревога, бидејќи постојат неколку можни објаснувања:
- Можеби детето проголтало малку крв од ранетата брадавица на градите за време на цицањето. Тоа нема да му наштети на вашето бебе и можете да продолжите да го доите и додека вашата брадавица заздравува.
- Траги на крв може да се појават поради гребење или раскинување на кожата во ректумот на бебето, ако има тврда и обилна столица. Но тоа ретко се случува кај новородените деца, бидејќи тие се уште не почнале да јадат цврста храна и мала е веројатноста за појава на констипација. Во секој случај, може да ставите малку антибактериска маст на кожата на бебето.
- Женското новороденче може да има благо крвав вагинален исцедок поради повлекување на мајчините хормони по породувањето. Обично запира кога хормоните ќе се вратат на нормално ниво. Кај машкото новороденче може да се појави слабо крвавење после зафат на обрежување.
- И на крај, пеленскиот осип може да доведе до крвавење ако состојбата се влоши.
Крвта во пелената станува проблем единствено ако крвавењето стане посилно и почесто или ако бебето се разболи и добие покачена температура.
Во секој случај, за да бидете мирни и сигурни за какво потекло на крв се работи, штом се појави крв во бебешката пелена, не заборавајте тоа да му го кажете на вашиот педијатар.
