Нема ништо полошо од тоа деновите да минуваат со постојано чувство дека околу стомакот носите гума за пливање. Подуеноста не е нужна – таа всушност претставува начин на кој телото испраќа сигнал дека стомакот не функционира како што треба. Доколку се игнорира, со тек на време може да се дојде во состојба да влијае на квалитетот на живот, ограничувајќи ја активноста и правејќи да се чувствуваме лошо поголем дел од времето. Надуеноста е присуство на вишок на воздух и непријатно чувство во стомакот, се смета дека околу две третини од популацијата повремено или постојано го има овој проблем.
Што предизвикува надуеност?
Може да станува збор за самостоен симптом или последица на некое органско или функционално заболување, но надуеноста сама по себе не е болест. Главно се појавува одвреме-навреме, трае различно и нема секогаш директна врска со степенот на ухранетоста, односно со дебелина, објаснуваат лекарите.
Постојат многу причини за оваа состојба. Најчесто станува збор за лоша исхрана и интолеранција на храна – особено на лактоза и фруктоза, како и нерамнотежа во цревата каде непосакуваните бактерии доминираат и произведуваат абнормални количини на гасови, па се јавува надуеност.
Кај поголем дел од луѓето со вакви тегоби не се работи за органско заболување, што значи дека причината за стомачните тегоби не е конкретна болест, како што е чир, камен во жолчката или тумор.
Како делувата исхраната?
Надуеноста може, но и не мора да биде поврзана со внесувањето на храна. Некогаш, велат лекарите, пациентите се жалат на надуеност и кога ќе испијат само вода. Секако, дека, објаснуваат тие, внесот на „тешка“ храна како зелка, брокула или мешункасти растенија влијае на надуеноста. Оваа храна тешко се вари, па тогаш се активираат микроорганизмите кои нормално се присутни во цревата и кои помагаат при варење на храната. Нивната активност доведува до создавање на гасови кои често се карактеристични со непријатен мирис. Понекогаш и самиот начин на исхрана може да биде причина за проблемот, па така прејадувањето или брзото голтање доведува до вишок воздух и обично е проследено со надуеност, гасови и подригнување.
Како да се реши проблемот?
Конечниот успех во лекувањето бара соработка на пациентот со лекарот, кога треба да се разгледа можноста за промена на секојдневниот животен ритам и лошите прехранбени навики, а лекарот треба да го охрабри и рационално да избере вистинска тераписка препорака. Само така, појаснуваат стручњаците, конечниот резултат ќе биде позитивен.
Сепак, лекарите велат дека е важно да се напомене оти надуеноста и гасовите во најголем процент од случаите се минливи тегоби кои, пред се, влијаат на квалитетот на живот.
Поради тоа, важно е да се утврди вистинската причина за нив. Ако надуеноста е резултат на исхраната, што е вообичаена појава, може да биде од корист водењето дневник на исхрана. Ова вклучува запишување на сите намирници и пијалаци кои се консумираат во текот на денот во период од неколку недели и бележење на несаканите симптоми. На тој начин може да се вочи образец, па е можно да се идентификуваат сите тригери за надуеност и да се избегнат. Исто така, познато е дека денес постојат некои типови на пробиотски бактерии кои можат значајно да помогнат во решавање на тегобите, за што во прилог зборуваат и многу актуелни светски препораки. Овие бактерии ја подобруваат перисталтиката (ритмичкото движење на дебелото црево) која ја поттикнува работата на цревата и го подобруваат вкупното варење на храната.
