Неретко поради брзање и немање време, во сета таа итаница, невнимавајќи може да се случат болни удари. Таквите трауми може да доведат до подлевање на крв под ноктите, што предизвикува хематом.
Хематомот (подлив на крв) на почетокот е со темноцрвена боја и е јасно видлив под ноктот, а прстот боли. Постепено хематомот ќе поцрни и со тек на време ќе израсне заедно со ноктот.
На ноктите на рацете им се потребни околу два месеца за комплетно да израснат, а на ноктите на прстите на нозете околу четири месеци. Доколку повредата зафатила и дел од коренот на ноктот, можно е естетската промена на него да остане засекогаш
Во случај на потешка повреда, потребен е третман на доктор, кој вклучува ослободување на крвта која останала под ноктот. Тоа се прави за да се спречи одвојување и паѓање на ноктот од прстот. Лекарот внимателно ќе го пробие ноктот и ќе направи мало дупче низ кое крвта ќе може да излезе.
Ноктот, веројатно, ќе остане темен и после третманот, но оваа дисколорација (промена на бојата) природно ќе израсне со ноктот. Со цел да се спречи можна инфекција, потребно е да се стерилизира прстот пред и после третманот, а повредениот прст да се замота во завој. За да се спречи отекување и болка, може да се ставаат ладни облоги врз завојот и да се држи прстот во повисока позиција во однос на телото.
Ако овој третман не помогне, вашиот лекар може да процени дека е потребно да се отстрани целиот нокт за да може на неговото место да израсте нов, здрав нокт.
Кај полесните повреди, кои не бараат лекарска интервенција, исто така, важи правилото дека ноктот треба веднаш да се стерилизира, а повредениот прст да се завитка во завој. Врз завојот се ставаат ладни облоги и прстот се држи во повисока положба во однос на телото.
