Едно постаро истражување покажало дека редовното консумирање засладени газирани пијалаци доведува до скратување на теломерите т.н. делови од ДНК кои се наоѓаат на краевите од хромозомите и кои всушност го штитат хромозомот од оштетување, што може да се поврзе со покус век на живеење. Газираните напитоци на тој начин го забрзуваат стареењето на организмот.
Од друга страна, едно поново истражување покажало дека трчањето во времетраење од 30 до 40 минути, 5 дена во неделата може да го забави скратувањето на теломерите и стареењето на телесните клетки.
Имено, податоците добиени од истражувањето направено врз 5 823 испитаници покажале дека биолошката старост на луѓето кои физички се мошне активни е за 9 години помала отколку кај луѓето кои претежно се бават со седентарни активности. Тие, исто така, се 7 години помлади (кога станува збор за биолошката старост) од личностите кои се умерено физички активни. Научниците оцениле дека триесет минути трчање, 5 пати неделно може да се сметаат за високо ниво на физичка активност, додека мажите за да го забават стареењето на организмот би требало да трчаат по 40 минути дневно, 5 пати неделно.
