Успеавте да ја победите зимската мрзеливост и почнавте да вежбате, но резултати нема. И понатаму се чувствувате тромаво и без сила, а мускулите како да не се ни помрднале и килограмите стојат. Тоа е затоа што правите некоја од следниве грешки:
Заборавате да се истегнете
После вежбањето мускулите се напнати, вклучително и срцето, па истегнувањето никако не би требало да го прескокнувате. Со истегнувањето ќе попушти напнатоста во мускулите и ќе се зголеми флексибилноста на телото. Истражувањата покажуваат дека истегнувањето по вежбањето ја намалува болката во мускулите која би можела да се појави следниот ден.
Не му давате време на организмот да се излади
Со вежбањето телото го тера срцето побрзо да работи и потребно ни е поголемо количество кислород затоа што циркулацијата е засилена. Затоа не е препорачливо веднаш после вежбањето да се легне и да се одмора. Наместо одеднаш да се „изгаснете“ смирете го темпото на вежбање, на пример, лесно одејќи по трака за да ви се смират отчукувањата на срцето. Ако нагло престанете со вежбањето додека отчукувањата на срцето се најбрзи, а телото има најголема потреба од кислород и циркулацијата е на најсилна брзина, би можело да ви се заврти.
Јадете веднаш по вежбањето
Храната богата со протеини ќе ви помогне мускулите да се опорават и формираат на вистинскиот начин. Па затоа храната која ја консумирате после тренинг би требало да содржи протеини во комбинација со јаглехидрати како протеински шејкови и јогурт измешан со јаткасти плодови или зрнесто овошје. Но со оброкот би требало малку да почекате, односно тој да дојде на ред околу 15 до 30 минути после вежбањето.
Заборавате да го хидрирате организмот доволно
За да ги надоместите загубените течности потребно е да внесувате доволно вода. Тоа е важно затоа што со тоа ќе се намали мускулната чувствителност, ќе се зголеми флексибилноста и ќе ви даде сила.
Не спиете доволно
Уште една битна ставка која често ја занемаруваме откако ќе не понесе адреналинот е важноста на сонот. Телото треба да закрепне и да се наполни со енергија за да изгради мускули. Ако не спиете доволно, на еден начин како самите да си го казнувате сопственото тело.
