Процесот на вакцинација против КОВИД-19 во земјава се одвива континуирано и досега две дози вакцина примиле 227.851 лице, заклучно неделата што измина. Колкав е бројот на комплетно вакцинирани граѓани, кои имунизацијата ја направиле во соседството не се знае, но сигурно е дека 484.220 граѓани се пријавени на веб платформата vakcinacija.mk и чекаат термин за заштита од КОВИД-19, преку примање на вакцина.
И додека процесот на вакцинација трае, се поставува прашањето што е со оние кои уште на почетокот на годинава, во февруари беа извакцинирани со две дози. Имено, високата ефикасност на вакцините од над 90 проценти трае шест месеци. А, тој рок полека истекува. Што после тоа? Треба ли да се започне со нов круг вакцинирање, а истовремено голем процент од населението не примило ниту една доза?
Одговор на тоа прашање засега нема никој.
Фајзер во април објави студија според која вакцината, против коронавирусот, е ефикасна 91 процент, како и 95 проценти против тешки форми на КОВИД-19 до шест месеци по втората доза.
Извршниот директор на оваа американска фармацевтска компанија изјави дека на луѓето најверојатно ќе им треба и трета доза вакцина против коронавирусот од шест до 123 месеци по вакцинирањето, како и довакцинирање секоја година поради појавата на нови варијанти на вирусот.
Вакцината АстраЗенека штити во нешто помал процент, но истражувањата кај постари лица покажуваат посилен одговор на заштитните Т-клетки во однос на останатите вакцини.
КОЛКУ ТРАЕ ЗАШТИТАТА? НИКОЈ НЕ ЗНАЕ
Имено, ако се погледне страната на Европската агенција за лекови, главен авторитет за ставање на вакцините на европскиот пазар, јасно е дека никој не знае колку долго вакцината пружа заштита. Кај сите вакцини достапни во ЕУ, од кои во земјава се користат само Фајзер и АстраЗенека пишува:
“Во моментов не е познато колку трае заштитата што ја дава вакцината. Лицата вакцинирани во клиничко испитување ќе продолжат да се следат во текот на следните две години за да се соберат повеќе повеќе информации за траење на заштитата“.
Единствена разлика е што кај АстраЗенека пишува дека истражувањето за траењето на заштитата ќе трае една година.
“Траењето на имунитетот по вакцинирањето не се знае. Ако ја прележиме болеста КОВИД-19 или ако се вакцинираме против неа, развиваме имунитетот. Точното траење на имуноста по прележувањето или по вакцинирањето допрва ќе се утврди. Болеста се појави пред една година и во моментовв не може точно да се знае траење на имунитетот“, велат стручњаците.
Ефектот од вакцината на ширење на вирусот не е познат
За вакцинираните важат сите мерки како и за невакцинираните, бидејќи не е познат ефектот на вакцината врз ширењето на вирусот.
На веб-страницата на Европската агенција за лекови (ЕМА) кај сите четири вакцини стои: „Ефектот од вакцинацијата врз ширењето на вирусот SARS-CoV-2 во заедницата сè уште не е познат. Не е познато ниту колку вакцинираните лица и натаму можат да го носат и шират вирусот.
Најнови истражувања: Можен е и траен имунитет
Постојат многу непознати, а малку одговори. Научниците интензивно работат на истражувања кои треба да дадат одговор на прашањето дали треба повторно да се вакцинираме по првите две дози, но и кога и уште колку пати.
Сепак, по тоа прашање, стигаат охрабрувачки вести. Минатата недела беше објавено дека вакцините Фајзер и Модерна во телото поттикнуваат повторлива имунолошка реакција која со години може да штити од коронавирусот. Ова ја отвори вратата кон тезата дека повеќето од целосно вакцинираните со мРНА вакцините нема да имаат потреба од т.н. бустер доза. Но, акцентот е ставен на оние кои го прележале КОВИД-19.
“На лицата кои се опоравиле од КОВИД-19 пред вакцинацијата, можеби нема да им треба дополнителна доза, дури и ако вирусот значително се трансформира. Тоа е добар знак “,изјави Али Елебеди, имунолог на Универзитетот Вашингтон, кој го водеше истражувањето објавено во списанието „Nature“.
Елебеди и неговите колеги заклучиле дека кај луѓето кои прележале КОВИД-19, имуните клетки кои го препознаваат вирусот мируваат во коскената срцевина најмалку осум месеци по инфекцијата. Студија на друг тим покажала дека таканаречените мемориски Б-клетки продолжуваат да созреваат и зајакнуваат најмалку една година по инфекцијата.
Врз основа на овие наоди, истражувачите сугерираат дека имунитетот може да трае исо години, можеби и цел живот, кај лицата кои биле заразени со коронавирус и подоцна се вакцинирани.
