Причините за вишок килограми можат да бидат различни кај различни луѓе. Неретко во прашање не е само една причина, туку нивна комбинација. Денес зборуваме за трите најчести причинители т.е. животни навики заради кои се дебелиме или не успеваме да ослабеме.
Сакате слатки и свесни сте дека шеќерот е „виновен“ за вашиот вишок
Доколку не можете да го замислите денот без слатки, особено без чоколадо, обидете се да го смените пристапот. Слаткото не мора да биде забрането кога сакате да ослабете, но сепак е важно да го ограничите неговото количество и да бирате здрави слатки. На пример, 30 до 50 г црно чоколадо со најмалку 70 % какао делови би требало да ја задоволат дневната потреба за слатко која обично се јавува меѓу оброците, во попладневните часови, додека истовремено поволно ќе влијае на имунитетот и ќе помогне во контрола на стресот.
Сте престанале да пушите и сега постојано имате потреба нешто да грицкате
Не само што по оставањето на цигарите често доаѓа до зголемување на апетитот, туку доаѓа и до намалување на базалниот метаболизам (никотинот инаку го зголемува базалниот метаболизам). Она што можете да го направите е да се погрижите да јадете три балансирани оброци дневно за да го избегнете гладот или потребата за слатки меѓу оброците. Доколку повеќе ви одговара да јадете помалку, а почесто, можете да воведете и два меѓуоброка. Посветете внимание на тоа ужините да бидат здрави (на пример, 1-2 овошки, чаша јогурт или шака јаткасти плодови). Исто така, обидете се да ја зголемите физичката активност или барем во текот на денот повеќе да одите.
Повеќе јадете затоа што сте нерасположени, лути, под стрес…
Ако имате обичај да јадете кога сте лошо расположени или под стрес, кога сте лути или ви е здодевно, од клучна важност е да станете свесни за оваа наквика (на пример, така што ќе водите дневник на исхраната и расположението), односно да се позанимавате токму со споменатите конкретни причини за поголем внес на храна. Кај лошото расположение, наместо вообичаените грицки и слатки обидете се во исхраната да внесете повеќе намирници кои докажано го подобруваат расположението. Исто така, можете однапред да ги испланирате и приготвите оброците – така постојат помали шанси дека, на пример, кога ќе се вратите гладни од работа ќе одберете некои не толку здрави јадења за да се наградите или утешите после напорниот работен ден.
