Се поголем број на трудници го ризикуваат здравјето на своето неродено дете со тоа што прекумерно вежбаат и се на диети за време на бременоста, покажала најновата студија.
Некои експерти веруваат дека за овој негативен тренд е виновна сликата која идните мајки ја имаат за славните трудници, кои дури и за време на бременоста изгледаат совршено и витко.
Бременоста не е период во кој треба да се гладува
Други, пак, веруваат дека жените се плашат од борбата со прекумерната тежина по породувањето и сакаат со време да го спречат прекумерното наталожување на килограмите.
Нормално и здраво се смета ако жената во време на бременоста додаде 10 до 13 килограми. Меѓутоа, и ова, исто така, зависи од тоа дали жената пред бременоста била полничка или имала нормална телесна тежина. Сепак, во развиените европски земји се повеќе и повеќе бремени жени претеруваат во своите намери за контролирање на телесната тежина за време на бременоста.
Нормално и здраво се смета ако жената во време на бременоста додаде 10 до 13 килограми
Многу е важно жените да сфатат дека бременоста не е период во кој треба да се изгладнуваат. Во текот на деветте месеци во матката бебето расте побрзо од кога било подоцна во животот.
Слабата исхрана и премало зголемување на телесната тежина во бременоста негативно влијаат врз развојот на фетусот. Научно е докажано дека се причина за слабиот раст на детето и неговата премала телесна тежина при раѓањето. Тие, исто така, може да доведат до предвремено породување.
За да им ги обезбедат на своето дете сите потребни хранливи состојки, мајките треба да консумираат одредени витамини, фолна киселина и доволно калциум.
Експертите не препорачуваат бремените жени да практикуваат диети. Доколку стравуваат од вишок на килограми, им се советува консултација со нутриционист, кој ќе им подготви квалитетен и здрав план на исхрана.
