Жените кои ќе се поправат повеќе од 18 кг за време на бременоста се изложени на два пати поголем ризик да носат крупно бебе, што најчесто подразбира тешко породување, предупредија американските научници.
Студијата во која биле вклучени 40 000 Американки и нивните бебиња покажала дека секоја петта трудница премногу се поправа за време на бременоста, а тоа резултира со раѓање на крупно бебе, со тежина од повеќе од четири килограми.
Интересно е што американските научници откриле дека жените кои ќе се здебелат повеќе од 18 килограми за време на бременоста, се изложени на поголем ризик да родат крупно бебе, дури и оние кои немаат гестациски дијабетес – тип на дијабетес, кој се јавува само за време на бременоста и кој ја зголемува можноста за раѓање на крупно бебе.
Бидејќи има многу прекумерно тешки трудници, важно е жената навистина сериозно да ги сфаќа советите на лекарите и да внимава на тежината за време на бременоста.
Бебињата на жените кои ќе се здебелат прекумерно за време на бременоста, едноставно се „програмирани“ да бидат крупни. Според стандардите на Американското здружение на гинеколози, за крупни бебињата се сметаат оние кои се потешки од четири килограми.
Крупните бебиња го зголемуваат ризикот од тешко породување – зголемено крвавење и повреда на рамењата на бебето, а многу често и породувањето мора да биде изведено со царски рез.
Бебињата на жените кои ќе се здебелат прекумерно за време на бременоста, едноставно се „програмирани“ да бидат крупни
Резултатите покажале дека 20 проценти од жените кои во бременоста се здебелиле повеќе од 18 кг родиле крупни бебиња. Само 12 отсто од жените кои се поправиле во граници на нормалата, родиле бебе со прекумерна тежина.
Како најризична се покажала групата на трудници кои се поправиле прекумерно и добиле гестациски дијабетес. Речиси 30 проценти од овие жени родиле бебиња со прекумерна тежина, во споредба со само 13,5 отсто од жените кои имале гестациски дијабетес, но нормална тежина за време на породувањето.
Истражувачите велат дека резултатите од студијата укажуваат на заклучокот дека жените навистина треба да одбегнуваат прекумерно здебелување за време на бременоста, а особено оние кои имаат гестациски дијабетес.
