ТРУЕЊЕ СО АЛКОХОЛ – како да се препознае и лекува

Претераното консумирање алкохол кое обично се дефинира како консумирање на пет или повеќе пијалаци по ред е особено опасно.

Труењето со алкохол е сериозна, а понекогаш и смртоносна последица од консумирањето големи количества алкохол во кус временски период, што може да влијае на дишењето, пулсот, рефлексот за повраќање и потенцијално да доведе до кома и смрт. Претераното консумирање алкохол во краток временски период е главна причина за труење со алкохол, кое може да има многу сериозни последици затоа ако забележите симптоми на труење со алкохол веднаш повикајте брза помош.

Труење со алкохол – симптоми

Знаците и симтомите на труење со алкохол вклучуваат:

  • Збунетост и вкочанетост;
  • Повраќање;
  • Напади;
  • Бавно дишење (помалку од осум вдишувања во минута);
  • Неправилно дишење (растојание од повеќе од 10 секунди меѓу вдишувањата);
  • Бледа или сина кожа;
  • Ниска температура на телото (хипотермија);
  • Несвестица.

Ако се сомневате на труење со алкохол, побарајте помош, па дури и ако сите симптоми не се присутни. Личноста која загубила свест или не може да се разбуди може да биде во животна опасност.

Колку алкохол е премногу?

За разлика од храната алкохолот се апосорбира многу побрзо од повеќето други хранливи материи. Сепак, на телото му е потребно повеќе време за да се ослободи од алкохолот кој сте го консумирале. Црниот дроб го преработува поголемиот дел од алкохолот, а потребно му е отприлика еден час за да се обработи алкохолот од еден пијалак. Еден пијалак се дефинира како 3,5 дл пиво, 1,4 дл вино и 0,4 дл дестилирани алкохолни пијалаци. Мешаните пијалаци може да содржат поголемо количество алкохол, па тогаш на црниот дроб му треба повеќе време да го преработи. Степенот според кој се обработува алкохолот може значително да се разликува од личност до личност, што зависи од низа фактори. Во целост, меѓутоа, црниот дроб успешно може да обработи само еден пијалак на час. Претераното консумирање алкохол кое обично се дефинира како консумирање на пет или повеќе пијалаци по ред е особено опасно. Консумацијата на поголемо количество алкохол за кратко време може да доведе до тоа да испиете количество алкохол опасно по животот пред да ја загубите свеста.



Што се случува во телото кога пиете?

Алкохолот ги депримира нервите кои ги контролираат акциите како што се дишењето, отчукувањата на срцето и рефлексот на повраќање, кој чува од задушување. Консумирањето големи количества алкохол може да ги забави, а во некои случаи и да ги исклучи овие функции. Исто така, може да се намали и температураата на телото, што доведува до срцев застој. Освен тоа и нивото на шеќер во крвта може да падне доволно ниско да предизвика напади.



Труење со алкохол – лекување

Лекувањето обично вклучува следење од страна на медицинско лице, додека телото во целост не го исфрли консумираниот алкохол.

Лекувањето обично вклучува:

  • Внимателно следење;
  • Превенција на дишењето и проблеми со задушување;
  • Терапија со кислород;
  • Интравенско давање течности, за да се спречи дехидрација;
  • Земање тиамин и глукоза по потреба – овие хранливи материи можат да помогнат во превенција од потенцијални посериозни компликации.

Возрасните и децата кои случајно консумирале метанол или изопропил можеби ќе имаат потреба од дијализа на бубрезите (механички начин на филтрирање на отпадот од организмот) со цел да се забрза отстранувањето на алкохолот од крвта.



САМОПОМОШ

Методите кои вообичаено можат да бидат корисни за трезнење обично не делуваат при труење со алкохол, а некои можат да бидат и опасни.

При труење со алкохол би требало да одбегнувате:

  • Црно кафе;
  • Ладен туш – шокот од студенилото може да резултира со губење на свеста;
  • Одење;
  • Спиење – може да ја загубите свеста додека спиете.

Ако се сомневате дека некој има труење со алкохол, еве како може да му помогнете:

  • Останете со личноста која повраќа и обидете се да ја поставите во седечка положба. Ако личноста мора да легне, погрижете се главата да ја заврти на страна – тоа помага да не дојде до задушување. Обидете се да ја држите личноста будна за да не ја загуби свеста.
  • Не плашете се да повикате брза помош. Понекогаш може да биде тешко да се процени дали се работи за труење со алкохол, но имајте на ум дека последиците може да бидат доста сериозни и не би требало да ризикувате, а особено не кога е во прашање малолетна личност.


СОВЕТ: Ако сте со некој кој консумирал големо количество алкохол и забележите знаци или симптоми на труење, веднаш побарајте стручна помош!