Цревната кандидијаза денес е се поголем проблем во развиенот свет, пред се, заради се поголемата употреба на високо преработена храна, како и намирници на кои им е додаден шеќер. Причина за тоа главно е габата Кандида албиканс. Навидум безопасна и незначителна габичка, но може да направи вистински хаос во човековиот организам.
Кој заболува?
Присуството на оваа габа во голем број во цревата денес е широко распространето меѓу популацијата на различна возраст. На неконтролираното размножување на кандидата влијаат сите фактори кои го ослабуваат имунолошкиот систем, па овој наод е чест кај хроничните болни – дијабетичари, заболени на кортикостероидна и хемотерапија, а можен е и кај бремени жени. Кај честа примена на антибиотска терапија, заради нарушена цревна флора – добрите бактерии, се создаваат услови за габично размножување. Исто така, се почесто како причина се наведува и долготрајната и несоодветна исхрана со поголем внес на шеќери, бело брашно, газирани напитоци, кафе, алкохол, а значително е и присуството на стресот.
Најчести симптоми
Најчести симптоми се појава на надуеност, зачестени и кашести столици, болки во стомакот, поретко запек, мачнини… можни се и општи симптоми како чувство на слабост, болка во мускулите, промени во расположението и алергиски промени на кожата. Кандидата се дијагностицира главно во примерок од столица.
Лекување и диета
Во лекувањето првенствено се препорачуваат различни пробиотски препарати кои треба наизменично да се менуваат, а потоа во консултација со лекар земајќи го предвид постоењето и на други болести или фактори на ризик да се применуваат и лекови од групата на антимикотици.
Денес акцент се става и на соодветен диететски режим кој подразбира одбегнување на прости шеќери, алкохол, бел леб, теста, масни сирења, свежо млеко, павлака, каде, додатоци во исхраната со адитиви. Се препорачува зеленчук (спанаќ, домати, тиквици, брокули, зелка, целер..), пробиотски јогурти, кефир, млади сирења, пилешко месо, мисиркино, јунешко, риба, јаткасти плодови, хељда, овес, киноа, растителни чаеви и свежо овошје во умерено количество.
Корисен е и внесот на витамини Ц и Б-комплекс, како и таканаречени природни антимикотици, во ограничено количество лук, масло од диво оригано, куркума и босилек, косоково масло, цимет… Се советува умерена физичка активност или методи за релаксација, со цел превенција на лошото влијание на стресот.
