Црн чај – ова е најпознатиот чај на светот кој најчесто се пие со појадокот и во утринските часови бидејќи има повеќе кофеин од останатите (двојно повеќе од зелениот и четири пати повеќе од белиот чај). Тој се добива со ферментација на листовите и затоа има црна боја.
Зелен чај – овој чај во последно време стана многу популарен на запад, пред се, поради своите нутритивни вредности кои се добри за здравјето. Зелениот чај се добива со минимална обработка на листовите, нема ферментација како кај црниот чај. Зелената боја ја дава хлорофилот од листот.
Бел чај – тој се добива идентично како и зелениот, само што во белиот чај се ставаат помлади листови. Белиот чај нема толку хлорофил како зелениот, па го нема тој тревест вкус.
Жолт чај – се добива слично како зелениот, со таа разлика што за него листовите подолго се сушат и затоа поприма жолта боја.
Количина на антиоксиданти во чајот
Црниот чај е на дното на скалата со најмалку антиоксиданти. За тоа е заслужно покомплексното производство кое со себе носи и уништување на некои нутриенти. Зелениот и жолтиот чај се богати со антиоксиданти. Постојат одредени контроверзи врзани за благотворното делување на зелениот чај. Имено, некои тврдат дека тој може да лекува дури и некои типови на карцином, како и мултиплекс склероза, но ниту едно од тие тврдења не е докажано. Белиот чај се уште е прилично неистражен, но може да се заклучи дека тој има уште повеќе антиоксиданти од зелениот чај, бидејќи станува збор за млади листови. За неколку години поточно ќе се знае неговиот состав и количината на корисни состојки, бидејќи сега се прават многу истражувања.
Кофеин
Овие вредности може да варираат зависно од квалитетот на чајот, процесот на подготовка и друго. Ова се просечни вредности на кофеин во напитокот:
- Шолја црно кафе од 80 до 160мг;
- Црн чај околу 50мг;
- Зелен чај околу 25мг;
- Бел чај околу 12мг.
