Црвен ветер или еризипел е заразна акутна болест на кожата предизвикана од бактерии, кои доаѓаат од познатата фамилија на Streptococcus бактерии (најчест причинител е Streptococcus beta haemolythicus група A). Овој вид на бактерии е познат по тоа што предизвикува низа непријатни последици, како што се воспаление на грлото, синусите или ушите, а во овој случај го напаѓа горниот слој на кожата и лимфното ткиво под неа. Тоа се случува откако кожата ќе се зарази преку повредени делови, главно во областа на нозете или главата.
Болеста главно се манифестира со ненадеен и црвен оток на кожата и симптоми на општа инфекција
Иако главниот симптом на оваа болест се големи, подиспакнати црвени дамки кои почнуваат да се појавуваат на инфицираните делови на кожата, може да се јават и дополнителни симптоми како плускавци и треска.
Причини
Причина за оваа болест е бактеријата која нормално живее на нашата кожа. Меѓутоа, кај нарушувања на метаболизмот или пад на имунитетот, бактеријата почнува да предизвикува штета и предизвикува инфекција откако од површината ќе влезе под кожата. Некогаш оваа болест се јавува како резултат на габични инфекции на стапалата или егзема, бидејќи по распукувањето на кожата, бактеријата влегува под неа. Во некои случаи, истото се случува и по инфекција во носот и грлото, кога бактериите продираат под кожата преку слузницата.
Болеста може да се добие и преку чирови на кожата, псоријаза или други кожни болести, после хируршки процедури, каснувања од инсекти или проблеми со крвотокот.
Бидејќи имунитетот игра голема улога во појавата на оваа болест, ризична група за заболување се лицата со слаб имунитет, децата и луѓето над 60-годишна возраст
Факторите кои можат да придонесат за појава на болеста понекогаш се надворешни. Тоа на пример, може да биде прекумерна консумација на алкохол или системска болест на организмот. Сите овие состојби го намалуваат имунитетот и телото е поподложно на инфекции, кои инаку не претставуваат голема закана. Болеста, исто така, може да се пренесе и преку директен контакт со заразено лице, а инкубацијата трае три до четири дена.
Симптоми
Кај голем број пациенти се јавува зголемена телесна температура, до 40 степени Целзиусови. Во истото време се јавуваат симптоми на грозница, слабост, главоболка, гадење и нагон за повраќање. По 24 часа, се зголемува чешањето и црвенилото, кое полека почнува да се шири. Зафатеното подрачје на кожата се манифестира, освен преку црвената боја, и со зголемено чувство на топлина, непријатност и болка.
Многу е важно кај црвениот ветар да се реагира на време. Ако доволно рано сте се обратиле кај вашиот лекар, тој ќе ви препише соодветна терапија, па по некое време ќе се повлечат симптомите, а црвенилото ќе исчезне.
Благовремената и соодветна терапија не е превенција од рецидив
Лекување
При појава на првите симптоми на црвен ветер, можете да се обидете да се лекувате дома, особено ако немате посебни здравствени проблеми. Сепак, децата и старите лица се препорачува веднаш да се однесат на лекар.
Ако инфекцијата се влоши, тоа значи дека нема да поминете без антибиотици. Вашиот лекар ќе ви препише лек, најчесто пеницилин или ќе ви даде инјекција ако инфекцијата е сериозна. Во случај на јака болка на местото на инфекција, може да земете благи аналгетици.
Бидејќи секоја болест е непријатна, па така и оваа, направете се за да ја спречите. Ако имате слаб имунитет, погрижете се да не ја добиете инфекцијата. Тоа ќе го постигнете доколку сите повреди кои ги имате на вашето тело, без разлика дали се обични гребнатинки или рани, ќе ги одржувате чисти. Благовремената и соодветна терапија не е превенција од рецидив. Рецидивот се лекува како и првиот атак.
