Многу често пациентите одат на дерматолог бидејќи забележале темна промена под ноктот. Понекогаш промената се појавува нагло и неочекувано, па пациентите бараат итен преглед или, пак, темната промена расте споро, понекогаш незабележливо, па за преглед пациентите се одлучуваат и по неколку месеци.
За време на прегледот, дерматологот прави дијагностичка обработка на темните промени на ноктот, бидејќи промената може да биде предизвикана од габички, повреда на ноктот, бенка под ноктот или малигнен тумор на основата на ноктот – меланом.
Најчесто се работи за крвавење под ноктот кое може да се појави и при најмала траума. Во случај на меланом, потребен е преглед кај лекар и дерматоскопија на самиот нокт. Понекогаш е потребно и хируршки да се отстрани ноктот и потоа да се направи хистопатолошка анализа за да се исклучи евентуално сомневање за постоење на меланом.
Секогаш, појаснуваат дерматолозите, со дерматоскопија на ноктот може да се утврди дали станува збор за бенигна промена или не, дали се работи за обично крварење под ноктот, предизвикана од траума на ноктот по спортување или носење тесни обувки. Ако постои сомневање за габична инфекција, се прави и миколошка обработка.
Меланомот на нокт не е честа појава и припаѓа во акролентигинозна форма на меланом
Оваа ретка форма на меланом може да изгледа како темна дамка под ноктот која расте и не поминува или како мал јазол под ноктот. Што точно ја поттикнува појавата на овој редок вид на меланом не е точно утврдено, но досега е утврдено кај пациенти кои користеле УВ лампи за печење на гел на ноктите.
