Тимот доктори од клиниката „Жан Митрев“, предводен од д-р Живорад Коцевски, пластичен хирург, отстранија тумор од пациент со големина од 35 килограми и 85 сантиметри. Туморната формација, за која анализата покажа дека е бенигна, беше во предел на долниот дел од абдоменот. По направената операција и успешното отстранување на туморот, пациентот е добар и се следи неговото опоравување.
„Во текот на операцијата беше отстранета една туморска маса со тежина од 35 килограми, а самата операција траеше седум часа. Третиот ден постоперативно пациентот се чувствува одлично, на нозе е, оди слободно и веќе планираме отпуст и враќање на секојдневните активности на пациентот“, изјави д-р Живорад Коцевски, пластичен хирург.
Клиниката „Жан Митрев“ со проширувањето на дејностите постојано воведува нови хируршки и терапевтски интервенции и поставува нови стандарди во здравствената пракса во земјава, за подобра нега и здравствена услуга за пациентите
Отстранувањето на тумор со тежина од 35 килограми од пациент е исклучително сложен хируршки зафат и бара висококвалификуван медицински тим. Туморите со такви големини се ретки и обично растат долго време пред да бидат дијагностицирани, што значи дека може да предизвикаат сериозни проблеми во телото и значајно зголемување на телесната тежина.
Ова е многу редок случај, да се прифати и успешно да се извади тумор со ваква големина, а за докторите од клиниката „Жан Митрев“ претставува револуционерен оперативен зафат со којшто се спаси животот на пациентот откако бил одбиен за операција од повеќе клиники, како во државата, така и во странство.
„Чувството после операцијата е прекрасно, благодарен сум на вас и на вашиот тим, на сите овде. Јас веќе не одам, него летам, лебдам! Чекорите не ги осеќам и прекрасно се чувствувам, немам зборови. Благодарам многу“, истакна пациентот во видеоизјава, заблагодарувајќи му се на д-р Коцевски и целиот тим од клиниката „Жан Митрев“.
Досега во медицинската пракса во земјава не е направена операција за отстранување на туморска формација со ваква големина, а медицинската литература опишува третирање на вакви маси до 40 сантиметри должина.
Клиниката „Жан Митрев“ со проширувањето на дејностите постојано воведува нови хируршки и терапевтски интервенции и поставува нови стандарди во здравствената пракса во земјава, за подобра нега и здравствена услуга за пациентите.
