Се повеќе мајки од европските земји и САД ги хранат своите новороденчиња со адаптирано млеко, за разлика од оние кои живеат во сиромашните земји или во земјите во развој, велат податоците кои ги објави УНИЦЕФ.
Мајките во најсиромашните земји во светот најчесто ги дојат своите деца до втората година од животот, што е во согласност со препораките на Светската здравствена организација и УНИЦЕФ.
Во земјите во развој, како Перу, Мадагаскар и Непал жените ги дојат своите деца во 99 отсто од случаите
Но Европа и САД многу заостануваат. Во Ирска, на пример, само 55 проценти од жените ги дојат своите новороденчиња и деца, во САД таа бројка е 74 отсто, а во Велика Британија 81 отсто.
Во Германија децата ги дојат 82 проценти од мајките, а скандинавските земји се во врвот на листата со 98 отсто на Швеѓанки, и 95 отсто Норвежанки кои дојат.
Сите истражувања ја потврдуваат важноста на доењето во првите месеци од животот.
Препораката на Светската здравствена организација е дека сите деца, освен ретки исклучоци, кои се медицински условени, треба да добиваат исклучиво мајчиното млеко барем во првите шест месеци од животот.
Со доењето треба да се продолжи и во втората половина од првата година, со постепено додавање друга храна (дохрана). Доењето може да продолжи сè додека мајката и детето тоа го сакаат.
Мајчиното млеко обезбедува балансиран однос на хранливи и заштитни материи неопходни за оптимален раст и развој на детето. Доењето има стимулирачки ефект врз развојот на имунолошкиот систем на детето.
Поради тоа доените бебиња во помал процент заболуваат од инфекции, алергии и автоимуни болести, и кај нов е помала опасноста од потенцијална смрт поради некротизирачки ентероколит и синдром на ненадејна смрт на детето.
Мајчиното млеко ги обезбедува сите хранливи и заштитни фактори неопходни за раст и развој на детето, кои не можат да бидат целосно заменети со адаптирано млеко за доенчиња.
