Неодамнешно истражување укажало на важноста од усогласување на времето на оброците и вежбањето. Имено, во зависност од тоа дали појадуваме пред или после физичка активност се менува ефектот на самото вежбање на телото и здравјето воопшто. Авторите на студијата сакале да испитаат како вежбањето пред или после јадење влијае на масните наслаги и чувствителноста на инсулин кај личностите со прекумерна телесна тежина.
Истражувањето траело шест недели и во него учествувале 30 мажи кои биле распоредени во три групи – првата група појадувала пред вежбање, втората после, а третата, контролна група не правела измени во начинот на живот од овој тип.
Испитаниците кои вежбале пред појадок согореле двојно повеќе масти од испитаниците кои појадувале, па вежбале. Објаснувањето за овој ефект е следно: испитаниците од првата група го продолжиле периодот на „гладување“ така што за време на вежбањето имале пониски нивоа на инсулин, што на телото му овозможило да потроши повеќе масти. Кај нив, исто така, била забележана подобра чувствителност на инсулин и регулирање на нивоата на шеќери во крвта. Испитаниците од двете групи ја подобриле својата физичка спремност и ослабеле во иста мера, но, значи, се покажало дека навиката за вежбање пред појадок со себе носи дополнителни здравствени бенефити.
