Сонцето емитува ултравиолетови зраци кои се невидливи со голо око и се делат на три групи – УВА, УВБ и УВЦ зраци. УВА зраците сочинуваат 98 отсто од ултравиолетовото зрачење на сонцето и се со послаб интензитет од УВБ, но продираат подлабоко во кожата и придонесуваат за појава на рак на кожата во подоцнежните фази од животот, стареење на кожата и нејзино потемнување.
УВБ зраците, од една страна, се неопходни за создавање витамин Д, но, од друга страна, се одговорни за сончаница, изгореници и појава на катаракта. УВБ зраците се најсилни од април до октомври, од 10 до 16 часот, додека на УВА зраците сме изложени во релативно слична мера во текот на денот, па дури и кога е облачно. Кога, пак, станува збор за УВЦ зраците тие се смртоносни, но, за среќа, не допираат до нас благодарение на озонската обвивка.
Дилема – дали автомобилските стакла штитат од УВ зраците?!
Можеби препораката да нанесувате крема за заштита од сонце пред возење со автомобил ви се чинела отсекогаш чудна, сепак добро е да знаете дека неодамнешните истражувања направени во склоп на една американска студија покажале дека стаклата на автомобилот не пружаат адекватна заштита од сончевите УВ зраци. Според нив проблемот не е толку во ветробранското стакло, колку во страничните.
Имено, ова истражување покажало дека шофершајбната задржува во просек од 95 до 98 % од УВА зрачењето, но дека страничните стакла во зависност од марката на автомобил запираат меѓу 44 и 96 проценти од УВА зрачењето.
